„Öll þekkjum við þann veruleika að lágt hlutfall kynferðisbrotamála ratar fyrir dóm. Að það er stórt skref að stíga fram og leggja fram kæru. Að biðin eftir málalokum er þungbær og kvíðavaldandi. Og þá má þetta ekki bara að gerast að svona fari.“
Þetta sagði Þorbjörg Sigríður Gunnlaugsdóttir, þingmaður Viðreisnar, undir liðnum störf þingsins á Alþingi í dag.
Hún skorar á dómsmálaráðherra og ríkisstjórnina að gera betur. „Ekki af því að við séum endilega að tala fyrir harðri refsipólitík, heldur vegna þess að við erum einfaldlega að tala um réttlæti. Málið snýst um réttlæti.“
Þorbjörg Sigríður sagði að því miður væru dómar í kynferðisbrotamálum reglulega mildaðir vegna þess að málsmeðferðartími hefði þótt of langur. Í einhverjum tilvikum hefði málsmeðferðartími orðið til þess að dómar fyrir þessi alvarlegu brot væru alfarið skilorðsbundnir.
Gagnrýnin beinist að stjórnvöldum
„Við ræðum mikið um innviði hér í þessum sal. Og mig langar til að ræða innviði. Og réttlæti. Löggæsla, ákæruvald og dómstólar eru grunnstoðir og mikilvægir innviðir, þessar stofnanir sem almenningur hefur til að leita réttar síns. Það eru þess vegna hagsmunir okkar allra að þessar stofnanir séu bæði faglegar og skjótvirkar,“ sagði hún.
Gagnrýni hennar beindist ekki að dómstólum eða ákæruvaldi. „Dómstólar dæma út frá þeirri reglu að verði málsmeðferð óhóflega löng af ástæðum sem sakborningi er ekki um kennt, þá geti það haft áhrif á refsingu. Þannig eru leikreglurnar. Ákæruvaldið býr við þær aðstæður að málafjöldi eykst ár frá ári en það sama gildir um ekki um fjölda starfsmanna. Nú liggur til dæmis fyrir að málum hjá ákæruvaldinu fjölgaði um 40 prósent á síðasta ári. Þess vegna þarf að styrkja þessa innviði með fleiri starfskröftum. Mér sýnist hins vegar sem ekki sé gert ráð fyrir neinni sérstakri aukningu hér.
Gagnrýni mín beinist að stjórnvöldum sem gera ekki betur gagnvart brotaþolum en þetta,“ sagði hún.
