Rósa Björk Brynjólfsdóttir, þingmaður utan flokka og fyrrverandi þingmaður Vinstri grænna, hefur gengið til liðs við þingflokk Samfylkingarinnar.
Frá þessu greinir þingmaðurinn í tilkynningu til fjölmiðla í dag.
Rósa Björk tilkynnti Katrínu Jakobsdóttur forsætisráðherra um úrsögn sína úr þingflokki Vinstri grænna þann 17. september síðastliðinn. Ástæðan var brottvísun á barnafjölskyldu frá Egyptalandi. Hún var annar þingmaður Vinstri grænna sem sagði sig úr þingflokknum á þessu kjörtímabili. Í lok nóvember í fyrra sagði Andrés Ingi Jónsson sig úr honum og greindi frá því að hann myndi starfa sem óháður þingmaður út kjörtímabilið.
Loftslags- og umhverfismál gerðu útslagið
„Pólitískar áherslur mínar og Samfylkingarinnar eru nátengdar með mikilvægi á aukinn jöfnuð í samfélaginu þar sem allir geta notið sín á eigin forsendum, burtséð frá stétt eða stöðu en líka á frið og sjálfbærni og opið, framsækið og fjölbreytt samfélag með áherslu á virka fjölþætta utanríkisstefnu.
Að undanförnu hefur Samfylkingin að auki lagt mun meiri og skýrari þunga á loftlagsmálin, og umhverfismálin en áður og lagt fram góða áætlun um græna viðspyrnu út úr COVID-19 kreppunni. Það gerir útslagið fyrir mig þegar kemur að því að taka þessa ákvörðun um að ganga í Samfylkinguna og þingflokk hennar. Ég hlakka mjög mikið til að taka þátt í starfi Samfylkingarinnar og að leggja mitt á vogarskálarnar til að bæta íslenskt samfélag,“ segir hún í yfirlýsingunni.
„Mikill hvalreki“ fyrir flokkinn
Formaður flokksins, Logi Einarsson, segir á Facebook það vera mikinn hvalreka fyrir Samfylkinguna þegar Rósa Björk gekk til liðs við þingflokkinn í dag.
„Ég hef kynnst henni ágætlega frá því við settumst á þing fyrir fjórum árum og álitið mitt á henni hefur vaxið stöðugt á þeim tíma.
Hún er án efa einn sterkasti þingmaðurinn sem á sæti á Alþingi í dag og í loftlags- og utanríkismálum standast henni fáir ef einhver snúning. Vertu velkominn til okkar kæra vinkona,“ skrifar Logi.
