Nokkrar svipt­ingar urðu á eigna­stöðu Seðla­banka Íslands erlendis á fyrstu sex mán­uðum árs­ins, en erlendar bankainn­stæður bank­ans juk­ust um 224 millj­arða króna, úr 169,4 millj­örðum í lok des­em­ber upp í 394 millj­arða í lok júní.

Að sama skapi hafa útistand­andi eignir bank­ans í erlendum verð­bréfum og öðrum eignum sem telj­ast til gjald­eyr­is­forða bank­ans dreg­ist mikið sam­an, eða úr 648 millj­örðum niður í 384 millj­arða, sam­kvæmt árs­hluta­upp­gjöri bank­ans sem birt var í dag.

Heilt yfir dróg­ust eignir Seðla­bank­ans saman um 44 millj­arða króna á fyrstu sex mán­uðum árs­ins og námu þær 919,6 millj­örðum króna að öllu með­töldu í lok júní­mán­að­ar.

Gjald­eyr­is­forði bank­ans nam 865,6 millj­örðum á þeim tíma, en hann sam­anstendur aðal­lega „af eign Seðla­bank­ans í góðum erlendum verð­bréfum og fé á reikn­ingum í traustum bönkum erlend­is, einkum í útbreidd­ustu gjald­miðl­un­um, svo sem Banda­ríkja­dal, evru, pundum og jen­i,“ eins og segir á vef Seðla­bank­ans.

Svo er gull einnig oft­ast á bil­inu 1-2 pró­sent gjald­eyr­is­vara­forð­ans. Í lok júní átti Seðla­bank­inn rúma 15,4 millj­arða í gulli, og hafði virði gull­eignar bank­ans auk­ist um rúmar 200 millj­ónir króna frá ára­mót­um. Gull­stangir bank­ans eru um 160 tals­ins og hafa þær verið geymdar á góðum stað erlendis í um 80 ár.