Banka­stjóri Íslands­banka, fram­kvæmda­stjórar og stjórn­ar­menn hafa farið fram á kaupauka í tengslum við nauða­samn­inga og mögu­lega sölu bank­ans. Vilja stjórn­end­urnir fá allt að 1 pró­senta hlut í bank­an­um, sam­kvæmt heim­ildum Morg­un­blaðs­ins, sem greinir frá þessu í Við­skipta-Mogg­anum í dag.

Hlutur stjórn­end­anna gæti numið tveimur millj­örðum króna sé miðað við bók­fært eigið fé í árs­lok 2014. Fyr­ir­mynd til­lög­unnar er sótt í sam­komu­lag sem var gert árið 2009 og tryggði starfs­fólki í Lands­bank­anum 1 pró­senta hlut í bank­an­um. Ekki er gert ráð fyrir því í til­lögu stjórn­enda Íslands­banka að almennir starfs­menn fái hlut­deild.

Morg­un­blaðið segir að stjórn­endur hafi lagt hug­myndir sínar fyrir kröfu­hafa bank­ans sem halda á langstærstu eign­ar­hlut. Ekki hefur náðst sam­komu­lag um kaupauka.

Stefnt á sölu

Stefnt er að sölu Íslands­banka á næst­unni. Í síð­ustu viku gerð­u Ís­lands­banki og Glitnir ramma­sam­komu­lag um sam­starf svo að slita­með­ferð Glitnis nái fram að ganga. Ramma­sam­komu­lagið kveður meðal ann­ars á um að sala á Íslands­banka til íslenskra fjár­festa verður tak­mörk­uð.

Í til­kynn­ingu til Kaup­hallar eru listaðar þær aðgerðir sem ráð­ist verður í. Þær eru hinar sömu og áður hefur verið greint frá, það eru  til­lög­urnar sem kröfu­hafar Glitn­is lögðu fyrir stýrni­efnd stjórn­valda um losun fjár­magns­hafta í júní síð­ast­liðnum. Í þeim til­lögum var sér­stak­lega talað um aðgerðir sem ráð­ist yrði í fyrir sölu Íslands­banka til ann­arra aðila, en hann er í dag að stærstum hluta í eigu slita­bús Glitn­is.