Stjórn Blaða­manna­fé­lags Íslands skorar á Katrínu Jak­obs­dóttur for­sæt­is­ráð­herra og rík­is­stjórn hennar að beita sér fyrir því gagn­vart banda­rískum stjórn­völdum að mál­sóknin gegn ástr­alska blaða­mann­inum Julian Assange verði felld nið­ur.

Þetta kemur fram í bréfi sem stjórn BÍ sendi á for­sæt­is­ráð­herra á mánu­dag. Þar segir að vax­andi skiln­ingur sé á því víða að mál­sóknin gegn Assange sé ekki ein­göngu aðför gegn einum blaða­manni heldur árás á fjöl­miðla­frelsi um allan heim.

„Ákæran gegn honum jafnar blaða­mennsku við njósnir og tók Trump-­stjórnin sér það vald að ákæra ástr­alskan blaða­mann fyrir útgáfu­starf­semi í Bret­landi, Þýska­landi, Sví­þjóð og Ísland­i,“ segir í bréf­inu frá BÍ, sem Sig­ríður Dögg Auð­uns­dóttir for­maður félags­ins und­ir­ritar fyrir hönd stjórn­ar.

Stjórn BÍ segir að for­dæmið sem sett sé með mála­rekstri Banda­ríkja­stjórnar gegn Assange þýði að allir blaða­menn, hvar sem er í heim­in­um, geti átt yfir höfði sér ákæru og fram­sals­kröfu ef þeir birta eitt­hvað sem banda­rískum stjórn­völdum hugn­ast að skil­greina sem ógn við sína hags­muni.

Stjórnin fer þess á leit við íslensk stjórn­völd að þau „nýti hver það tæki­færi sem upp kemur í sam­skiptum við banda­rísk stjórn­völd til þess að vekja athygli á þeim mann­rétt­inda­brotum sem Assange verður fyrir og hve til­hæfu­lausar ásak­an­irnar gegn honum eru.“

Í bréfi stjórn­ar­innar er bent á að öll helstu mann­rétt­inda­sam­tök heims og einkum þau sem sér­stak­lega berj­ast fyrir mál­frelsi og fjöl­miðla­frelsi styðji Assange í bar­átt­unni gegn þess­ari aðför Banda­ríkja­stjórn­ar, sem engum dylj­ist að sé póli­tísk í eðli sínu.