Jón, betur þekktur sem Meðaljón, eignaðist konu í síðasta þætti af Ferð til fjár á RÚV. Jón og Gunna stofnuðu fjölskyldu og komust að því að kostnaðurinn er töluverður. Hlutir á borð við barnarúm, skiptiborð, kerru, kopp og barnastól fyrir Litla-Jón kosta samtals um hálfa milljón króna.
Síðan eru það bleyjurnar. Litli-Jón þarf um fimm til átta bleyjur á dag. Samtals kaupa Jón og Gunna því bleyjur fyrir um 250 þúsund krónur þar til sonurinn lærir að kúka í kopp.
Til þess að geta keypt þetta allt þá þurfa hjónin að vinna, og til þess þurfa þau barnapössun. Fyrst fá hjónin dagmömmu. Hún kostar um milljón á ári. Síðan er það leikskólinn sem kostar um 350 þúsund krónur á ári.
Fjölskyldumyndin. Jón forseti, nafni og fyrirmynd Litla-Jóns, er í bakgrunni.
Kjarninn og Stofnun um fjármálalæsi hafa tekið höndum saman og munu fjalla ítarlega um heimilisfjármál samhliða þáttunum Ferð til fjár, sem sýndir verða á RÚV næstu vikur. Markmiðið: Að stuðla að betra fjármálalæsi hjá landsmönnum! Næsti þáttur er á dagskrá fimmtudaginn 19. febrúar. Fylgstu með á Facebook-síðu Ferðar til fjár.
