Seðla­banki Evr­ópu hefur ákveðið að halda áfram að veita Grikk­landi lausa­fjár­að­stoð eins og verið hefur und­an­far­ið. Grískir bankar þurfa þessa aðstoð, ekki síst í ljósi þess að bankainn­stæður í grískum bönkum hafa hríð­fallið und­an­farnar vikur og síð­ustu daga hefur áhlaup verið gert á þá.

Þrátt fyrir þennan mikla þrýst­ing verður aðstoð seðla­bank­ans ekki aukin heldur henni haldið óbreyttri. Nú velta margir fyrir sér hvort grískir bankar muni yfir höfuð opna í fyrra­mál­ið. Karl Whelan, pró­fessor við Uni­versity Col­lege Dublin, er meðal þeirra sem hefur efa­semdir um að allir bankar geti opnað.

Christine Lag­ar­de, fram­kvæmda­stjóri Alþjóða­gjald­eyr­is­sjóðs­ins, sendi frá sér yfir­lýs­ingu fyrir skömmu þar sem fram kemur að sjóð­ur­inn sé áfram til­bú­inn til að aðstoða Grikk­land og vinna bæði með Grikkjum og Evr­ópu­sam­band­inu og Seðla­banka Evr­ópu.

Grískir fjöl­miðlar greina frá því að klukkan sex á íslenskum tíma hafi verið boðað til rík­is­stjórn­ar­fundar í Grikk­landi.

Seint í gær­kvöldi sam­þykkti gríska þingið að boðað verði til þjóð­ar­at­kvæða­greiðslu um til­lög­urnar sem lán­ar­drottnar þeirra hafa lagt fram, þrátt fyrir að lán­ar­drottn­arnir hafi sagt að til­lög­urnar hafi ekki verið end­an­leg­ar. Atkvæða­greiðslan á að fara fram eftir viku, sunnu­dag­inn 5. júlí.

Þá verður núver­andi neyð­ar­að­stoð­ar­sam­komu­lag Grikk­lands við lán­ar­drottn­anna runnið út, og þeir eiga að hafa staðið í skilum á 1,5 millj­arði evra í afborgun af láni frá Alþjóða­gjald­eyr­is­sjóðn­um.