Ef erlendir aðilar kaupa 95 pró­sent hlut kröfu­hafa Glitnis í Íslands­banka mega þeir ekki selja íslenskum aðilum bank­ann aftur næstu fimm árin. Þetta kemur fram í erindi sem kröfu­haf­arnir sendu stjórn­völdum fyrir hádegi síð­ast­lið­inn mánu­dag, skömmu áður en blaða­manna­fundur um áætlun stjórn­valda um losun hafta hófst.

Frétta­blaðið greinir frá þessu og segir að skil­yrðið sé komið frá kröfu­höf­unum sjálf­um, ekki Íslands­banka, í því skyni að fá sem mest af virði sölu bank­ans til erlends aðila. Þar er haft eftir Páli Eiríks­syni, sem situr í slita­stjórn Glitn­is, að hann túlki ­fyrr­greinda grein í bréfi kröfu­hafa til stjórn­valda þannig að í þessu felist að Íslands­banki verði ekki í eigu inn­lendra aðila næstu fimm árin. "Þú sérð það nú bara á þess­ari til­ kynn­ingu sem er á vefnum hjá ráðu­neyt­inu að þar eru menn að und­ir­gang­ast það að bank­inn verði ekki í eigu inn­lendra aðila að minnsta kosti næstu fimm árin," segir Páll við Frétta­blað­ið.

Kjarn­inn greindi frá því á mánu­dag að búist sé við því að erlendir fjár­festar í Íslands­banka verði kynntir til leiks í næstu viku. Við­ræður við nokkra hópa hafa staðið yfir um nokk­urra mán­aða skeið og þeir sem hafa sýnt mestan áhuga koma ann­ars vegar frá löndum við Persaflóa í Mið-Aust­ur­löndum og hins vegar frá Kína. Sam­kvæmt heim­ildum Kjarn­ans er um að ræða risa­stór fyr­ir­tæki sem eiga þegar hluti í alþjóð­legum bönk­um. Ein­hverjir hópanna rit­uðu undir vilja­yf­ir­lýs­ingu um kaup á bank­anum í febr­úar síð­ast­liðn­um.

Tveir mögu­leikar í stöð­unni

Tvennt er í stöðu Glitnis er varðar sölu 95 pró­sent eign­ar­hlutar í Íslands­banka og skipt­ingu sölu­verðs­ins milli kröfu­hafa og stjórn­valda. Ef bank­inn verður seldur erlendum aðilum fyrir gjald­eyri þá mun ríkið fá 60 pró­sent sölu­and­virð­is, en þó eigi meira en 60 pró­sent af bók­færði virði eigin fjár sem yrði um 119 millj­arðar við söl­una. Það myndi þýða að ríkið fengi um 71 millj­arð í gjald­eyri ef bank­inn er seldur erlendum aðil­um.

Sam­kvæmt erindi kröfu­haf­anna lítur málið öðru­vísi út ef bank­inn er seldur inn­lendum aðil­um. Þá yrði gefið út 119 millj­arða veð­tryggt skulda­bréf á 5,5 pró­sent vöxtum til stjórn­valda, greitt við sölu 95 pró­sent hlutar Glitnis í Íslands­banka. End­ur­heimtur bréfs­ins yrðu jafn­miklar og sölu­and­virði bank­ans, upp að 119 millj­örðum króna. Sölu­and­virði hærra en 119 millj­arðar og upp að 136 millj­örðum myndi skipt­ast til helm­inga milli kröfu­hafa og rík­is­ins. Sölu­and­virði hærra en 136 millj­arðar króna myndi renna að 75 pró­sent hluta til rík­is­ins.