Fjöldi ferða­manna sem hafa heim­sótt Ísland það sem af er ári er kom­inn yfir eina millj­ón. Það þýðir að fleiri ferða­menn heim­sóttu landið á fyrstu níu mán­uðum árs­ins 2015 en gerðu það allt árið 2014, sem þó var metár. Straumur ferða­manna hefur auk­ist alla mán­uði árs­ins, frá 23,4 til 34,5 pró­sent. Þetta kemur fram í nýbirtum tölum frá Ferða­mála­stofu Íslands.

Um 123 þús­und erlendir ferða­menn fóru frá land­inu í sept­em­ber síð­ast­liðnum sam­kvæmt taln­ingum Ferða­mála­stofu í Flug­stöð Leifs Eiríks­sonar eða 35 þús­und fleiri en í sept­em­ber á síð­asta ári. Aukn­ingin nemur 39,4 pró­sent milli ára og hefur hún ekki mælst svo há milli ára í sept­em­ber frá því Ferða­mála­stofa hóf taln­ing­ar.

Í til­kynn­ingu frá Ferða­mála­stofu segir að 71 pró­sent ­ferða­manna í sept­em­ber síð­ast­liðnum hafi ver­ið af tíu þjóð­ern­um. Banda­ríkja­menn voru fjöl­menn­astir eða 22,7 pró­sent af heild­ar­fjölda og næst­fjöl­menn­astir voru Þjóð­verjar (10,3 pró­sent) og Bretar (10,3 pró­sent). Þar á eftir fylgdu síðan Kanada­menn (5,5 pró­sent), Norð­menn (4,5 pró­sent), Frakkar (4,1 pró­sent), Danir (4,0 pró­sent), Svíar (3,7 pró­sent), Kín­verjar (3,5 pró­sent) og Spán­verjar (2,8 pró­sent).

"Af ein­staka þjóð­ernum fjölg­aði Banda­ríkja­mönn­um, Bret­um, Þjóð­verj­um, Kanada­mönnum og og Kín­verjum mest milli ára í sept­em­ber en 12.643 fleiri Banda­ríkja­menn komu í sept­em­ber í ár en í fyrra, 3.294 fleiri Bret­ar, 2.734 fleiri Þjóð­verjar, 2.347 fleiri Kanada­menn og 2.342 fleiri Kín­verj­ar. Þessar fimm þjóðir báru uppi 67,2% aukn­ingu ferða­manna í sept­em­ber. Dön­um, Norð­mönnum og Rússum fækk­aði hins vegar í sept­em­ber í ár frá því í fyrra," segir í til­kynn­ing­unni.

Flogið beint til Egils­staða

Fjölgun ferða­manna sem heim­sækja Íslands hefur verið gríð­ar­leg und­an­farin ár og er búist við því að heild­ar­fjöldi þeirra í ár verði um 1,3 millj­ón­ir. Allar spár gera ráð fyrir áfram­hald­andi fjölgun á næstu árum og á kynn­ingu á veg­vísi í ferða­mál­um, sem fram fór í gær, sagði Ragn­heiður Elín Árna­dótt­ir, ráð­herra ferða­mála, að reiknað væri með að gjald­eyr­is­tekjur vegna ferða­mála yrðu 1.000 millj­arðar króna árið 2030. Þær eru áætl­aðar um 350 millj­arðar króna í ár.

Í dag var einnig til­kynnt um að beint flug milli London og Egils­staða, sem hefj­ast mun næsta sum­ar. Flogið verður tvisvar í viku á milli áfanga­stað­anna.