Bjarni Benediktsson, fjármála- og efnahagsráðherra, hefur svarað ítarlegri fyrirspurn Katrínar Jakobsdóttir, formanns Vinstri grænna, um niðurfærslu verðtryggðra fasteignaveðlána.
Í svarinu er fyrirspurninni, sem er í 15 liðum, ekki svarað heldur sagt að ráðherrann hyggist leggja „fyrir Alþingi ítarlega skýrslu um niðurstöður höfuðstólslækkunar húsnæðislána þar sem m.a. verður fjallað um þau atriði sem spurt er um í þessari fyrirspurn. Skýrslan mun byggjast á stöðu úthlutunar eins og hún verður við lok samþykkisfrests á ráðstöfun leiðréttingarfjárhæðar en eins og er vantar of mikið upp á endanlegar niðurstöður til að skynsamlegt sé að draga nægilega marktækar ályktanir um þetta mál. Reiknað er með því að skýrslan verði tilbúin og kynnt á vorþingi“.
Aðgerðirnar snúast um að láta 80 milljarða króna renna úr ríkissjóði í niðurgreiðslu á húsnæðislánum, eða í formi sérstaks persónuafsláttar, þeirra Íslendinga sem voru með verðtryggð húsnæðislán á árunum 2008 og 2009.
Leiðréttingin, skuldaniðurfelling ríkisstjórnarinnar á verðtryggðum húsnæðislánum, kostar ríkissjóð um 80 milljarða króna.
Hversu margir sem greiddu auðlegðarskatt fengu höfðustólslækkun?
Þegar útfærsla á niðurfellingum ríkisstjórnarinnar var kynnt var það gert með glærukynningu. Í þeirri glærukynningu vantaði mikið af upplýsingum um skiptingu niðurfellingarupphæðarinnar á milli til dæmis tekju- og aldurshópa. Þar vantaði líka upplýsingar frádráttarliði og hvernig upphæðin dreifist á mismunandi landssvæði.
Katrín Jakobsdóttir lagði fram fyrirspurn í 15 liðum um málið þann 11. nóvember síðastliðinn. Svar fjármála- og efnahagsráðherra barst í dag í því fólst, líkt og áður sagði, að hún muni fá svör við fyrirspurn sinni í skýrslu sem verði skrifuð og á að verða kynnt á komandi vorþingi.
Fyrirspurn Katrínar hljóðaði svo:
- Hvernig skiptist heildarupphæð þeirrar fjárhæðar sem varið verður til lækkunar verðtryggðra fasteignaveðlána einstaklinga milli höfuðstólslækkunar og frádráttarliða?
2. Hverjir eru frádráttarliðirnir og hver er skiptingin milli þeirra í upphæðum?
3. Hvert er heildarhlutfall beinnar höfuðstólslækkunar, þ.e. lækkunar höfuðstóls að undanskildum frádráttarliðum, af verðtryggðum fasteignaveðlánum?
4. Hve mikið hafa verðtryggð lán hækkað frá árinu 2007?
5. Hve mikið hefði 20% skuldaniðurfærsla lækkað verðtryggð fasteignaveðlán heimilanna?
6. Hve mikið hefði 250 milljarða kr. skuldaniðurfærsla lækkað verðtryggð fasteignalán heimilanna?
7. Hver væri upphæð leiðréttingar ef hún miðaðist við að verðtryggð húsnæðislán væru færð niður um fjárhæð sem samsvarar verðbótum umfram 4,8% sem féllu til á tímabilinu desember 2007 til ágúst 2010?
8. Hver væri upphæð leiðréttingar ef hún miðaðist við að verðtryggð húsnæðislán væru færð niður um fjárhæð sem samsvarar verðbótum umfram 2,5% sem féllu til á tímabilinu desember 2007 til ágúst 2010?
9. Hversu margir umsækjendur um skuldaniðurfærslu fá enga beina höfuðstólslækkun?
10. Hversu margir framteljendur sem greiddu auðlegðarskatt fá niðurfærslu?
11. Hversu há upphæð rennur til þeirra framteljenda sem borga auðlegðarskatt?
12. Hvernig dreifist heildarupphæðin á tekjubil hvers tíunda hluta fyrir sig? Hver er fjöldi framteljenda á bak við hvert tekjubil?
13. Hve stór hluti heildarupphæðarinnar fer til fólks með tekjur yfir miðgildi tekna?
14. Hvernig dreifist heildarupphæðin eftir þeim landshlutum þar sem framteljendur eru búsettir?
15. Hve stór hluti heildarupphæðarinnar fer til framteljenda sem eru yfir meðalaldri?
