Breytt skipan ráðu­neyta í nýrri rík­is­stjórn gæti kostað rík­is­sjóð allt að 1,77 millj­örðum króna á þessu kjör­tíma­bili. Kostn­að­ur­inn fer aðal­lega í fjölgun starfa sem fylgir breyttu skipu­lagi, þar á meðal rit­ara, bíl­stjóra og aðstoð­ar­manna nýrra ráð­herra. Þetta kemur fram í svari Bjarna Bene­dikts­sonar fjár­mála­ráð­herra við fyr­ir­spurn Helgu Völu Helga­dótt­ur, þing­manni Sam­fylk­ing­ar­inn­ar, sem birt­ist á vef Alþingis í dag.

Fyr­ir­spurn Helgu var í nokkrum lið­um, en í þeim fyrsta var spurt um árlegan við­bót­ar­kostnað rík­is­sjóðs við að fjölga ráð­herrum um tvo, líkt og rík­is­stjórnin hefur gert. Sam­kvæmt Svari Bjarna er áætl­aður heild­ar­launa­kostn­aður vegna þess 13 millj­ónir króna fyrir hvern ráð­herra, en honum fylgja tveir aðstoð­ar­menn sem kosta 43 millj­ónir króna árlega, auk rit­ara sem kosta 11 millj­ónir króna og bíl­stjóra sem kosta 14 millj­ónir króna.

Til við­bótar er einnig kostn­aður fólgin í stofnun tveggja nýrra ráðu­neyta, þar sem ráðu­neyt­is­stjórum og almennum starfs­mönnum þeirra muni fjölga, auk þess sem annar rekstr­ar­kostn­aður og leiga á hús­næði fellur til. Svo er einnig tal­inn með kostn­aður við 30 millj­óna kaup á bún­aði og tækjum fyrir bæði ráðu­neytin og 40 millj­óna króna auka­fjár­heim­ild vegna óvissu. Sam­tals nemur heild­ar­fjár­heim­ildin 450 millj­ónum króna.

Helga spurði einnig hvernig kostn­að­ur­inn skipt­ist upp í launa­kostnað og annan kostnað vegna breyt­inga á skrif­stofu­hús­næði. Sam­kvæmt svari Bjarna er stærsti hlut­inn, eða um 84 pró­sent, vegna fjölg­unar starfa, en við­bót­ar­kostn­aður vegna breyt­inga á hús­næði er tal­inn vera tak­mark­aður þar sem þegar var hafin vinna við að færa starf­semi Stjórn­ar­ráðs­ins yfir í nýtt hús­næði.

Bjarni áætl­aði að upp­safn­aður við­bót­ar­kostn­aður fyrir allt kjör­tíma­bilið í heild sinni myndi nema 1,77 millj­örðum króna, en bætti þó við að kostn­að­ur­inn gæti orðið nokkru hærri ef nýta þurfti svig­rúm fyrir óvissu í áætl­un­inni. Á móti vegi að Stjórn­ar­ráðið hygð­ist ráð­ast í end­ur­skipu­lagn­ingu á fyr­ir­komu­lagi stoð­þjón­ustu ráð­herra, en sam­kvæmt honum gæti slík breyt­ing leitt til auk­ins hag­ræðis í rekstri, sem ekki sé tekið til­lit til í þessum töl­um.