Stjórn­völd í Grikk­landi, með Syr­iza flokk­inn í broddi fylk­ing­ar, ákváðu í dag að banna atvinnu­manna­fót­bolta í Grikk­landi vegna síend­ur­tek­inna óláta á fót­bolta­leikjum í land­inu, þar sem bullur hafa vaðið uppi með ofbeldi og skemmd­ar­verk­um.

Upp úr sauð á leik tveggja af stærstu knatt­spyrnu­fé­lögum Grikk­lands, Pan­athinai­kos og Olympía­kos, síð­ast­lið­inn sunnu­dag og blönd­uð­ust bæði knatt­spyrnu­stjórar og stjórn­ar­menn félag­anna í deilur fyrir og eftir leik.

Stjórn­völd í Grikk­landi hafa í nokkur skipti reynt að stöðva ólæti á fót­bolta­leikj­um, meðal ann­ars í tvígang í vet­ur, með tíma­bundnum bönnum og pen­inga­sekt­um. Fyrst í sept­em­ber og síðan í nóv­em­ber.

Ný rík­is­stjórn, sem Syr­iza hefur leitt frá því eftir kosn­ingar í síð­asta mán­uði, hét því að taka þetta mál föstum tök­um, og óhætt er að segja að hún geri það. Sam­kvæmt frétt breska rík­is­út­varps­ins BBC um málið er allt óvíst hvenær atvinnu­manna­fót­bolti í land­inu fer aftur af stað, en bannið nær til þriggja efstu deilda í land­inu.

Talið er lík­legt að laga­setn­ing, sem á að hemja ólæt­in, sé í bígerð og að atvinnu­manna­fót­bolti muni hefj­ast aftur innan tíð­ar. Við­mæl­andi BBC lýsir miklum efa­semdum um þessar ákvarð­anir stjórn­valda og segir að þetta muni engu breyta. Ólæti á fót­bolta­leikjum í Grikk­landi eigi sér 30 til 40 ára sögu, og nær úti­lokað sé að koma í veg fyrir þau með póli­tískum aðgerðum og laga­setn­ingu.

https://www.youtu­be.com/watch?v=T­P1i6knkSFc