Áfrýj­un­ar­dóm­stóll ÍSÍ kveður upp dóm sinn á þriðju­dag­inn um ­meint svindl Arn­ars Pét­urs­sonar í Reykja­vík­ur­mara­þon­inu. Arnar kom fyrstur Íslend­inga í enda­mark hlaups­ins, sem fram fór laug­ar­dag­inn 31. ágúst síð­ast­lið­inn, rúmum níu mín­útum á undan næsta manni og var krýndur Íslands­meist­ari karla í mara­þoni. Næsti Íslend­ingur á eftir Arn­ari var hlaupar­inn Pétur Sturla Bjarna­son, sem sigr­aði Reykja­vík­ur­mara­þonið árið áður.

Pétur Sturla kærði úrslit hlaups­ins til yfir­dóm­nefndar Reykja­vík­ur­mara­þons, og sak­aði þar Arnar um svindl í hlaup­inu með því að hafa notið lið­sinnis tveggja hjól­reiða­manna í hlaup­inu.

Kæruna byggði Pétur Sturla á 10. grein reglna Reykja­vík­ur­mara­þons, en þar seg­ir: "Hlaupa­brautin er ein­göngu ætluð kepp­end­um. Ekki er heim­ilt að fylgja hlaup­urum gang­andi, hlaup­andi, á hjóli eða öðrum far­ar­tækjum (und­an­þága fyrir fylgd­ar­menn fatl­aðra). Það er á ábyrgð þátt­tak­enda að vísa frá þeim sem vilja fylgja." Þá segir í 18. grein regln­anna: "Brot á ofan­greindum reglum ógilda þátt­töku­rétt í hlaup­in­u."

Yfir­dóm­nefnd Reykja­vík­ur­mara­þons vís­aði kæru máls­ins frá. Í úrskurði dóm­nefnd­ar­innar er við­ur­kennt að tveir hjól­reiða­menn hafi fylgt Arn­ari þrjá fjórðu hluta hlaupa­leið­ar­inn­ar, sem hafi verið brot á reglum mara­þons­ins, en dóm­nefnd­inni þótti ekki sannað að hjól­reiða­menn­irnir hafi aðstoðað Arnar í hlaup­inu. Þá hefði sigur hans verið það afger­andi að fylgd­ar­menn hans hefðu ekki haft áhrif á úrslit hlaups­ins.

Pétur Sturla kærði nið­ur­stöðu yfir­dóm­nefnd­ar­innar til dóm­stóls ÍSÍ, sem stað­festi úrskurð yfir­dóm­nefnd­ar. Kær­andi áfrýj­aði þá þeirri  nið­ur­stöðu til áfrýj­un­ar­dóm­stóls ÍSÍ, sem mun taka málið fyrir á þriðju­dag­inn. Þar sem Pétur Sturla er búsettur erlendis mun full­trúi hans mæta í hans stað við fyr­ir­töku máls­ins. Hæsta­rétt­ar­lög­mað­ur­inn Jón Gunnar Zoëga er for­seti áfrýj­un­ar­dóm­stóls ÍSÍ.