Aðstand­endur sam­fé­lags­mið­ils­ins Reddit hafa sótt sér 50 millj­ónir Banda­ríkja­dala í nýtt hlutafé að und­an­förnu, eða sem nemur um sex millj­örðum króna. Sam­kvæmt fréttum frétta­mið­ils­ins Quartz í gær er heild­ar­virði hluta­fjár metið á 500 millj­ónir Banda­ríkjdala í þessum við­skipt­um, eða sem nemur um 60 millj­örðum króna. Á meðal þeirra sem keyptu hlut í Reddit voru rapp­ar­inn Snoop Dogg og leik­ar­inn og tón­list­ar­mað­ur­inn Jared Leto. Fjár­fest­arnir Marc Andrees­sen og Peter Thiel keyptu einnig hlut.

Andrees­sen er þekktur nýsköp­un­ar­fjár­festir og kom meðal ann­ars að stofnun Mosaic og Netscape, en hann rekur nú fjár­fest­inga­sjóð á sviði frum­kvöðla­starf­semi.

Thi­el, sem er fæddur í Þýska­landi, hefur einnig víð­tæka reynslu af nýsköp­un­ar­fjár­fest­ing­um. Hann var á meðal stofn­enda Pay Pal ásamt Elon Musk, eig­anda Tesla Motors og SpaceX.

Upp­haf­lega hug­myndin að baki Reddit var að gefa les­endum mögu­leika á því að fylgj­ast með því sem væri nýj­ast og áhuga­verð­ast á vefn­um. Mið­ill­inn er gríð­ar­lega vin­sæll í Banda­ríkj­unum og þykir hafa marg­vís­lega vaxt­ar- og tekju­mögu­leika.