Svíar hafa hætt rann­sókn á nokkrum af ásök­un­unum á hendur Julian Assange, stofn­anda Wiki­leaks, því kæru­frestur er að renna út. Bretar segja Ekvador hafa hindrað fram­gang rétt­vís­innar með því að hýsa Assange í sendi­ráði sínu í London. Sky News greinir frá þessu.

Sak­sókn­ari í Sví­þjóð­hefur haft Assange til rann­sóknar fyrir meinta nauðgun og kyn­bundið ofbeldi sem á að hafa átt sér stað í ágúst 2010. Nauðg­un­ar­rann­sókn­inni hefur verið hætt. Assange hefur haldið sig í sendi­ráði Ekvador síðan í júní 2012 þegar Bretar sam­þykktu að fram­selja hann til Sví­þjóð­ar.

Hugo Swire, und­ir­ráð­herra í utan­rík­is­ráðu­neyti Breta, hefur stað­fest að sendi­herra Bret­lands í Quito, höf­uð­borg Ekvador, muni leggja form­leg mótæli fyrir stjórn­völd þar í landi. Bretar séu skyldugir til að fram­selja Assange.

Sænski sak­sókn­ar­inn lét hafa eftir sér að Julian Assange hafi „forð­ast ákæru­valdið með því að leita hælis í sendi­ráði Ekvador.“ Jen Robin­son, einn lög­fræð­ing­anna í teymi Assange, hafnar þessum ásök­unum Svía og segir skjól­stæð­ing sinn hafa verið til­bú­inn til að bera vitni í sendi­ráð­inu. Búið var að semja um dag­setn­ingu yfir­heyrslu í London í júní síð­ast­liðnum en sænsk yfir­völd hættu við á síð­ustu stundu.

Assange hefur ekki hætt sér út fyrir lóð sendi­ráðs­ins í London af ótta við að vera fram­seldur til Sví­þjóð­ar. Þaðan telur hann sig verða fram­seldan til Banda­ríkj­anna fyrir að birta leyni­gögn á vef Wiki­leaks.