Alls eru 78 prósent Íslendinga andvíg því að flugbraut 06/24, oft nefnd neyðarbraut, á Reykjavíkurflugvelli verði lokað. Þetta kemur fram í könnun sem MMR vann fyrir samtökin Hjartað í Vatnsmýrinni, sem hafa barist gegn lokun brautarinnar. Á höfuðborgarsvæðinu eru 74 prósent íbúa andvígir því að brautinni verði lokað samkvæmt könnuninni. Í Reykjavik einni saman eru 68 prósent á móti lokun brautarinnar. Hægt er að lesa niðurstöður könnunarinnar hér.
Í tilkynningu frá Hjartanu í Vatnsmýrinni er haft eftir Friðriki Pálssyni, formanni samtakanna, að niðurstaðan sýni einhug landsmanna og höfuðborgarbúa í flugvallarmálinu. "Hér er spurt um nákvæmlega það sem er að gerast núna á vellinum, tilraunir borgarinnar til að loka neyðarbrautinni. Enginn þarf nú að efast um afstöðu landsmanna til neyðarbrautarinnar. Niðurstaðan hlýtur að vekja stjórnmálamenn til umhugsunar."
Könnunin var unnin af MMR dagana 16. - 21. apríl 2015 og spurt var "Ert þú fylgjandi eða andvíg(ur) því að flugbraut 06/24 á Reykjavíkurflugvelli, oft nefnd neyðarbraut, verði lokað?" Svarfjöldi var 1.001 manns.
Þarf að loka neyðarbrautinni
Til stendur að reisa á bilinu 800 til 850 íbúðir á Hlíðarendasvæðinu í Reykjavík. Framkvæmdirnar eru hluti af aðalskipulagi Reykjavíkurborgar og búið er að samþykkja breytingar á deiliskipulagi þannig að þær geti hafist. Framkvæmdirnar hafa í för með sér að minnsta flugbraut Reykjavíkurflugvallar, sem stundum er kölluð neyðarbraut, verður ónothæf, en hún hefur hvorki verið á deili- né aðalskipulagi frá árinu 2007.
Í febrúar samþykkti meirihluti borgarstjórnar Reykjavíkur samkomulag við Valsmenn ehf. um uppbyggingu íbúðalóða á þeim hluta Hlíðarendasvæðisins sem liggur að umræddri flugbraut.
Fyrr í þessum mánuði hófust loks framkvæmdir við framkvæmdarveg sem þarf að að leggja milli íþrótta- og byggingasvæðisins. Það hefur vakið mikla reiði hjá mörgum andstæðingum þess að Reykjavíkurflugvöllur verði fluttur úr Vatnsmýrinni. Hjartað í Vatnsmýrinni skoraði til að mynda á Alþingi og innanríkisráðherra að stöðva framkvæmdirnar og Sigmundur Davíð Gunnlaugsson forsætisráðherra sagði í ræðu sinni á flokksþingi Framsóknarflokksins í apríl að öllum mætti vera ljóst „að grípa þarf til varna fyrir Reykjavíkurflugvöll og koma í veg fyrir að borgaryfirvöld grafi stöðugt undan flugvellinum og beiti brögðum til að losna við hann.“
Vísað í skipulagsreglur Reykjavíkurflugvallar
Þann 17. apríl síðastliðinn sendi innanríkisráðuneytið bréf til borgarstjóra Reykjavíkur í tilefni af leyfi sem Reykjavíkurborg veitti til framkvæmda á svæði Valsmanna við Hlíðarenda. Í bréfinu stendur:
„Ljóst er að framangreindar framkvæmdir, sem framkvæmdaraðili hefur nú byrjað, eru undanfari frekari uppbyggingar og byggingaframkvæmda á svæðinu sem ekki getur orðið af að óbreyttum skipulagsreglum Reykjavíkurflugvallar.“
Umræddar skipulagsreglur voru settar þegar Kristján L. Möller var samgönguráðherra, í ágúst 2009. Þær voru settar samkvæmt loftferðalögum frá árinu 1998, en fram til ársins 2009 höfðu reglur af þessu tagi aldrei verið settar.
Reykjavíkurborg gerði athugasemdir við tímasetningu reglnanna, og taldi að skipulagsreglur af þessu tagi ættu að koma í kjölfar endurskoðunar á deiliskipulagi flugvallarins, sem væri gert á grundvelli aðalskipulags. Því taldi borgin að fresta hefði átt gildistöku reglnanna þangað til endurskoðun aðalskipulags og deiliskipulags hefði átt sér stað.
Þessu sögðust samgönguyfirvöld ekki vera sammála, reglurnar tækju mið af gildandi deiluskipulagi. Hins vegar sögðu þau í umsögn um athugasemd borgarinnar: „Samgönguyfirvöld hafa ekki skipulagsvald á svæðinu og því er ljóst að komi til breytinga á aðalskipulagi eða deiliskipulagi vallarins þarf að endurskoða reglurnar en slíkt er einfalt mál.“ Í reglunum sé vísað til þess að þær taki mið af gildandi aðalskipulagi og deiliskipulagi vallarins.
Ótímabært að gefa út leyfi og hefja framkvæmdir
Í bréfi innanríkisráðuneytisins segir einnig að Samgöngustofa hafi til umfjöllunar möguleg áhrif lokun neyðarbrautarinnar og að Rögnunefndin svokallaða, sem kannar mögulega flugvallarkosti, hafi ekki lokið störfum. „Á meðan að niðurstöður nefndarinnar liggja ekki fyrir og ekki hafa verið teknar ákvarðanir á grundvelli tillagna hennar verður flugbraut 06/24 [svokölluð neyðarbraut] ekki lokað eða aðrar ákvarðanir teknar sem leiða til þess að flugbrautin verði tekin úr notkun.
Í ljósi framangreindra atrið var með öllu ótímabært að gefa út framkvæmdaleyfi og hefja framkvæmdir á þeim grundvelli. Ráðuneytið skorar á Reykjavíkurborg að virða gildandi skipulagsreglur og þá stjórnsýslumeðferð sem er í gangi fyrir Samgöngustöfu.“
Undir bréfið skrifuðu Ólöf Nordal innanríkisráðherra og ráðuneytisstjórinn Ragnhildur Hjaltadóttir.
Hægt er að lesa bréfið í heild sinni hér.
Segir framkvæmdirnar ekki hafa áhrif á flugvöllinn
Dagur B. Eggertsson, borgarstjóri Reykjavíkur, segir hins vegar að þau framkvæmdaleyfi sem gefin hafi verið út á Valsreitnum svokallaða, tengist einungis veglagningu og undirbúningsframkvæmdum á reitum sem séu utan fluglínu.
Framkvæmdirnar hafi því hvorki áhrif á Reykjavíkurflugvöll til eða frá.
