Fram­leiðni­vandi er á Íslandi, draga þarf úr mark­aðs­hindr­unum sem hamla nýsköpun og hæfni skortir á ýmsum sviðum atvinnu­lífs­ins, meðal ann­ars vegna brott­falls úr fram­halds­skól­um. Þetta er meðal þess sem kemur fram í nýrri skýrslu Efna­hags- og fram­fara­stofn­un­ar­innar (OECD), sem kynnt var í dag.

Angel Gur­ría, fram­kvæmda­stjóri stofn­un­ar­inn­ar, er staddur hér á landi og hélt blaða­manna­fund ásamt Bjarna Bene­dikts­syni fjár­mála­ráð­herra í dag. Hann sagði efna­hags­batann eft­ir­tekt­ar­verðan og við­snún­ing­inn meiri og hrað­ari en ann­ars staðar í Evr­ópu. „Við teljum horfur almennt góð­ar, en hins vegar er ljóst að ekk­ert má gefa eft­ir. Ísland stendur enn frammi fyrir þeim áskor­unum að tryggja sjálf­bæran hag­vöxt, sér í lagi að styrkja und­ir­stöður efna­hags­legs stöð­ug­leika, festa í sessi árang­ur­inn í rík­is­fjár­málum og efla fram­leiðni­vöxt,“ sagði hann um skýrsl­una.

Í skýrsl­unni kemur fram að launa­hækk­anir í nýjum kjara­samn­ingum krefj­ist aðhalds í pen­inga­mál­um, sem muni draga úr hag­vexti. Sömu­leiðis geti kjara­samn­ing­arnir haft nei­kvæð áhrif á sjálf­bærni í rík­is­fjár­málum til lengri tíma. Þá hvetur OECD til var­færni við losun hafta og vill að tekjur sem fást af los­un­inni verði not­aðar til lækka skuld­ir.

Þá bendir OECD á að áhætta felist í líf­eyr­is­skuld­bind­ingum hins opin­bera og vanda Íbúða­lána­sjóðs. Stofn­unin vill að Íbúða­lána­sjóður verði lagður nið­ur.

Skýrslu OECD má finna á vef­síðu stofn­un­ar­innar og úrdrátt á vef­síðu fjár­mála­ráðu­neyt­is­ins.