Ólafur Ragnar Gríms­son, for­seti Íslands, hefur ekki ákveðið hvort hann bjóði sig fram aftur í emb­ættið á næsta ári. Ólafur Ragnar hefur setið sem for­seti frá árinu 1996 og hefur því gegnt emb­ætt­inu í 20 ár þegar yfir­stand­andi kjör­tíma­bili hans lýkur á næsta ári.

For­set­inn var gestur útvarps­þátt­ar­ins Sprengisands í dag. Þar sagð­ist hann finna fyrir því að margir vilji að hann haldi áfram sem for­seti. Það finni hann víða, síð­ast á lands­leik karla­lands­liðs Íslands í gær. „Þegar ég mæti í skóla og ann­ar­staðar er alltaf að koma fólk að mér og segja að ég eigi að halda áfram, það sýnir mér að þetta er í hugum margra.“

Ólafur Ragnar segir að hann muni ræða það við eig­in­konu sína og dætur hvort hann eigi að bjóða sig fram á ný og að sú ákvörðun verði kynnt í nýársávarpi hans. Á­stæðan fyrir því hann ákvað að bjóða sig aftur fram árið 2012 hafi verið vegna óska fjölda fólks um að gera það. "Þá var þjóðin að heyja margar örlagaglímur á mörgum svið­um. Þessum glímum er að mörgu leyti lok­ið. Ég hef aldrei talið mig ómissandi og ef ég tek þá ákvörðun um að hætta vona ég að því verði sýndur fullur skiln­ing­ur.“