Rannsóknarnefnd Alþingis um starfsemi Íbúðalánasjóðs réð systurdóttur Kirstínar Flygenring, sem átti sæti í nefndinni, í vinnu og dóttur Kirstínar einnig. Þær störfuðu báðar við lokafrágang skýrslunnar. Þetta kemur fram í svari forseta Alþingis við fyrirspurn Karls Garðarssonar, þingmanns Framsóknarflokksins, en hann spurði ítarlega um starfssemi rannsóknarnefnda á vegum Alþingis, meðal annars út í launakostnað og vinnufyrirkomulag.
Sigurður Hallur Stefánsson og Kirstín Flygenring hófu störf hjá rannsóknarnefndinni 1. september 2011 og Jón Þorvaldur Heiðarssonar 6. september 2011. Tveir nefndarmenn gátu í upphafi ekki helgað sig starfinu að fullu, segir í svari forseta Alþingis.
Var Jón Þorvaldur Heiðarsson í 50% starfi frá 6. september til desemberloka 2011, í 80% starfi frá 1. janúar 2012 til marsloka 2012 og í 80% starfi frá 1. apríl til 31. maí 2013. Kirstín var í 75% starfi í nóvember 2011 og í 80% starfi í desember 2011. Nefndin skilaði skýrslu sinni 2. júlí 2013. Laun Sigurðar voru á 23 mánaða starfstíma nefndarinnar 29,6 milljónir króna. Laun Kirstínar voru 25,6 milljónir króna og laun Jóns Þorvalds Heiðarssonar voru ríflega 24 milljónir króna.