Breski bank­inn Royal Bank of Scotland tap­aði 3,5 millj­örðum punda í fyrra, eða sem  nemur 714 millj­örðum króna. Þrátt fyrir það greiðir bank­inn, sem breska ríkið á 79 pró­sent hlut í, 421 milljón punda í bón­us­greiðslur til starfs­manna, eða sem nemur um 85 millj­örðum króna.

Frá þessu greinir breska rík­is­út­varpið BBC. For­stjóri bank­ans, Ross McEwan,  segir í við­tali við BBC að bón­us­greiðsl­urnar séu sér­staka­lega við­kvæmt efni, en sagði þær vera hluta af rekstr­ar­um­hverf­inu og að þær væru „nauð­syn­leg­ar“ til þess að laða fólk til bank­ans sem gæti fram­kvæmt tækni­lega erf­iða hluti.

Royal Bank of Scotland var að stærstum hluta þjóð­nýtt­ur, haustið 2008, eftir að bank­inn fór næstum í þrot í hremm­ing­unum á fjár­mála­mörk­uð­um. Inn­viðir bank­ans reynd­ust miklu mun verri en margir höfðu reiknað með, og því hefur starf­semi bank­ans mót­ast að miklu leyti af því alveg frá hausti 2008. Tapið vegna rekst­urs­ins í fyrra má rekja til lélegrar afkomu Cit­izens, sem er dótt­ur­fé­lag bank­ans í Banda­ríkj­un­um.