Á Hróarskelduhátíðinni, sem nú stendur sem hæst, stendur yfir metnaðarfullt verkefni sem gengur út á að safna þvagi úr hátíðargestum með það að markmiði að endurvinna pissið og nota til bjórgerðar. Fréttamiðillinn The Guardian greinir frá málinu.
Skipuleggjendur hátíðarinnar stefna að því að safna hátt í 25.000 lítrum frá yfir 100.000 hátíðargestum til bjórgerðarinnar, sem verða notaðir nánar tiltekið til að frjóvga bygg sem síðar verður notað til að brugga ljósan bjór, eða pilsner.
Á Hróarskelduhátíðinni má nú sjá langar biðraðir karlmanna sem bíða eftir því að losa þvag ofan í sérstakar málmtrektir, en pissinu er safnað saman í sérsmíðaða tanka sem eru svo fluttir á akra í nágrenninu þar sem það er notað í fyrrgreindum tilgangi.
Verkefnið hefur hlotið heitið: „Fra pis til pilsner,“ eða Úr pissi yfir í bjór, og var hleypt af stokkunum á yfirstandandi Hróarskelduhátíð. Um er að ræða samstarfsverkefni tónlistarhátíðarinnar og dönsku landbúnaðarnefndarinnar (DAFC).
Ef allt gengur að óskum geta gestir Hróarskelduhátíðarinnar árið 2017 mátt eiga von á því að fá tækifæri til að bragða „pissbjórinn.“ Ferlið hefur verið kallað „beercycling.“
Hér má sjá myndræna framsetningu á ferlinu.
„Þvagið sem gestir Hróarskelduhátíðarinnar hafa skilið eftir sig hefur haft neikvæð áhrif á umhverfið og holræsakerfið okkar,“ hefur The Guardian eftir Leif Nielsen, formanni DAFC. „Verkefnið okkar mun nú breyta þvaginu í auðlind. Flestir sjá tilgang og skemmtun í því að gefa okkur persónulegt framlag til bjórgerðarinnar og tónlistarmennirnir hafa tekið framtakinu opnum örmum sem hjálpar óneitanlega mikið til.“
Leif vonar að einhverjar af stærri stjörnum hátíðarinnar láti ekki sitt eftir liggja, en þeirra á meðal eru meðal annarra Sir Paul McCartney og Pharrel Willims. „Við settum upp sérstakar pissuskálar við sviðin þar sem hljómsveitirnar stíga á stokk, þannig vð við vonum að við náum að safna líka rokkstjörnuþvagi,“ segir Marie Grabow frá DAFC.