Á síð­ustu þremur mán­uðum hefur Bernie Sand­ers, for­seta­fram­bjóð­andi í Banda­ríkj­unum sem sæk­ist eftir útnefn­ingu Demókrata, safnað nærri því jafn háum fjár­hæðum í kosn­inga­sjóð sinn og vin­sæl­asti fram­bjóð­and­inn, Hill­ary Clint­on, hefur gert. Á tíma­bil­inu safn­aði Sand­ers um 26 millj­ónum doll­ara, jafn­virði ríf­lega 3.300 millj­ónum króna, sam­an­borið við 28 milljón doll­ara sem runnu í sjóð Clint­on.

Ágætt gengi Sand­ers í kosn­inga­bar­átt­unni hefur komið mörgum á óvart. Sand­ers er á vinstri væng póli­tíska lit­rófs­ins í Banda­ríkj­unum og seg­ist sjálfur vera sós­í­alisti. Á kosn­inga­fundum hefur hann dregið að fjölda fólks. Í umfjöllun Fin­ancial Times um málið í dag segir að upp­hæð­irnar sem nú renna í kosn­inga­sjóði Sand­ers end­ur­spegli auknar vin­sældir hans. Það megi meðal ann­ars sjá af lýð­fræði þeirra sem styrkja fram­boð­in. Mun algeng­ara er að ein­stak­lingar styrki Sand­ers heldur en fyr­ir­tæki eða sterk­efn­aðir sjóðir auð­ugra fjöl­skyldna. Því er öfugt farið hjá Clint­on.

En þrátt fyrir að Sand­ers njóti vin­sælda hjá hópi Demókrata þá benda skoð­ana­kann­anir til að hann ógni ekki fram­boði Hill­ary Clint­on, að minnsta kosti enn sem komið er. Nýjasta könn­unin leiddi í ljós 18 pró­sentu­stiga for­skot Hill­ary meðal kjós­enda Demókra­ta­flokks­ins. Um 43 pró­sent aðspurðra sögð­ust myndu kjósa Hill­ary sam­an­borið við 23 pró­sent fylgi Sand­ers. Fylgi vara­for­seta Banda­ríkj­anna, Joe Biden, mæld­ist tutt­ugu pró­sent í könn­un­inni. Hann hefur ekki til­kynnt um fram­boð en íhugar nú hvort hann blandi sér í slag­inn.