Auto Trader, bresk vef­síða sem selur nýja og not­aða bíla á net­inu, heldur hluta­fjár­út­boð í dag sam­hliða því að fyr­ir­tækið verður skráð á mark­að.

Í til­kynn­ingu frá Auto Trader vegna skrán­ing­ar­innar kemur fram að verð á hlut í útboð­inu sé 235 pens, sem þýðir að heild­ar­virði þeirra hluta sem eru boðnir til sölu er 2,4 millj­arðar punda, eða 490 millj­arðar króna. Um er að ræða 59 pró­sent hluta­fjár í fyr­ir­tæk­inu og því er heild­ar­virði þess, miðað við hluta­fjár­út­boð­ið, um 830 millj­arðar króna. Business Insider greinir frá.

Auto Trader ein­beitir sér ein­vörð­ungu að bíla­sölu í Bret­landi og Írlandi. Vöru­merkið fyr­ir­tæk­is­ins er eitt það þekktasta í breska bíla­iðn­að­in­um, en í könnun sem HPI Brand Tracker fram­kvæmdi í lok síð­asta árs kom fram að 92 pró­sent aðspurðra Breta þekktu Auto Tracker og vissu hvernig þjón­ustu fyr­ir­tækið veit­ir.

Auto Trader breytti um stefnu sum­arið 2013 og var eftir það ein­vörð­ungu staf­rænt mark­aðs­torg. Áður hafði fyr­ir­tækið rekið bíla­söl­ur. Þessi breyt­ing hefur skilað sér í gríð­ar­legri aukn­ingu á mark­aðs­hlut­deild í bíla­sölu á mark­aðs­svæði Auto Trader.