Nauðsamningur slitabús Kaupþings gæti verið í uppnámi ef Vincent Tchenguiz, fjárfestir sem höfðað hefur mál gegn búinu, fær heimild hjá áfrýjunardómstóli í Bretlandi til að áfrýja skaðabótakröfu sinni gegn því. Í ViðskiptaMogganum í dag er greint frá því að Tchenguiz hafi fram að helgi til að sækja um áfrýjunarleyfið. Fái hann það þá er mögulegt að slitabú Kaupþings geti ekki klárað nauðasamning sinn fyrir áramót. Þá mun stöðugleikaskattur leggjast á búið.
Tchenguiz stefndi Grant Thornton í Bretlandi og tveimur starfsmönnum fyrirtækisins, Kaupþingi og Jóhannesi Rúnari Jóhannssyni, formanni slitastjórnar búsins, fyrir að hafa lagt á ráðin um, haft frumkvæði að og tekið þátt í, rannsókn bresku efnahagsbrotadeildarinnar Special Fraud Office (SFO), á honum og fyrirtækjum í hans eigu. Þetta hafi leitt til þess að hann var handtekinn á heimili sínu í mars 2011 og leitað var á skrifstofu hans og í fyrirtækjum í hans eigu. Hann vill fá 2,2 milljarða punda, um 455 milljarða króna, í bætur vegna þessa.
Tilgangurinn, að sögn Vincent Tchenguiz, var sá að nota rannsókn SFO á meintum glæpum hans til að knýja hann til að semja um málefni sinna félaga gagnvart Kaupþingi, afla gagna frá SFO, sem embættið gerði upptækt í húsleit hjá Vincent, sem Kaupþing hefði ella ekki getað aflað og síðan misnota þau gögn í samskiptum sínum við Vincent Tchenguiz. Hann telur að með þessu hafi Kaupþing viljað komast yfir eignir hans og fyrirtæki sem honum tengdust. Þetta átti að skila Kaupþingi auknum eignum og Grant Thornton í Bretlandi auknum greiðslum, þar sem starfsmenn fyrirtækisins myndu sjá um skipti á þeim eignum sem teknar yrðu yfir.
Um síðustu mánaðarmót hafnaði breskur undirdómstól málatilbúnaði Jóhannesar Rúnars um að þarlendir dómstólar hafi ekki lögsögu í máli sem athafnamaðurinn Vincent Tchenguiz hefur höfðað gegn honum. Jóhannes Rúnar vildi að málið yrði tekið fyrir á Íslandi þar sem einungis íslenskir dómstólar hefðu lögsögu yfir uppgjöri slitabús Kaupþings, en af því verður ekki.
Dómstóllinn taldi málið varða atburði sem áttu sér stað á breskri grundu og því verði þeir teknir fyrir af bresku réttarkerfi. Hins vegar var viðurkennt að breskir dómstólar hafi ekki lögsögu yfir slitabúi Kaupþings enda geri íslensk gjaldþrotalög ráð fyrir því að íslenskir dómstólar hafi einir lögsögu yfir þeim. Þeirri ákvörðun gæti Tchenguiz mögulega áfrýjað.
Gæti komið í veg fyrir nauðasamning
Í ViðskiptaMogganum er haft eftir ónafngreindum lögfræðingi að ef krafa Tchenguiz verði tekin til efnislegrar meðferðar fyrir breskum dómstólum þurfi slitastjórn Kaupþings að gera ráð fyrir mögulegri greiðslu skaðabótanna við gerð nauðasamnings, þar til endanlegur dómur fellur í málinu. Það valdi því að slitastjórnin þurfi, verði af afrýjun, að halda frá allt að allri fjárhæð bótakröfunnar.
Það myndi leiða til þess að ekki væri hægt að ganga frá nauðasamningi fyrr en niðurstaða í málinu lægi fyrir. Það gæti tekið mörg ár. Eignir slitabús Kaupþings námu um síðustu áramót tæpum 800 milljörðum króna og stór hluti eigna búsins bundinn vegna kröfu Tchenguiz haldist hún lifandi.
Það gæti orðið til þess að slitabúið nái ekki að klára nauðasamning sinn fyrir áramót líkt og stærstu kröfuhafar þess hafa samið við íslenska ríkið um að gera. Í því samkomulagi samþykkja þeir að mæta framlögðum stöðugleikaskilyrðum ríkisins. Takist ekki að klára nauðasamninginn fyrir þann tíma mun stöðugleikaskattur upp á 39 prósent leggjast á allar eignir búsins.
