Ásmundur Frið­riks­son þing­maður Sjálf­stæð­is­flokks­ins gerði kaup Síld­ar­vinnsl­unnar á jörð­inni Fann­ar­dal í Norð­firði að umtals­efni undir liðnum störf þings­ins á Alþingi í dag.

Hann benti á að áformað væri að nýta jörð­ina til skóg­ræktar til að binda kolefni móti kolefn­islosun sem starf­semi fyr­ir­tæk­is­ins veld­ur.

„Stefnan er að hin fyr­ir­hug­aða skóg­rækt í landi Fann­ar­dals verði fram­kvæmd í sam­vinnu við Skóg­rækt rík­is­ins. Verk­efnið á að full­nægja öllum kröfum lofts­lags­ráðs um vottun og á rækt­unin að vera hæf til skrán­ingar í Lofts­lags­skrá Íslands sam­kvæmt vef fyr­ir­tæk­is­ins. Það er ánægju­legt að fyr­ir­tækið hugi mark­visst að verk­efnum á sviði umhverf­is­mála,“ sagði hann.

Ásmundur bætti því hins vegar við að hér væri tæki­færi útgerð­ar­innar að styðja við bakið á land­bún­aði í land­inu með því að fela bændum að taka að sér skóg­rækt fyrir útgerð­ina í stað þess að útgerðin færi að stunda land­búnað í formi skóg­rækt­ar.

„Fer ekki vel á því að útgerðin geri það sem hún er best í, að veiða fisk, og bændur sjái um land­bún­að­inn og skóg­rækt­ina sem þeir eru betri í en útgerð­in? Sam­starf um smá­virkj­anir gæti líka gagn­ast báðum aðil­um. Ég sé þarna til­valið tæki­færi fyrir tíma­móta­sam­vinnu útgerðar og bænda og að gam­alt orð fái nýja merk­ingu; útvegs­bændur virkja saman skóg.“

Ætti að lýsa yfir neyð­ar­á­standi í „að­gerða­leysi á upp­bygg­ingu flutn­ings­kerfis raf­orku“

Að end­ingu benti þing­mað­ur­inn á að Síld­ar­vinnslan og fleiri fyr­ir­tæki hefðu farið í raf­væð­ingu fiski­mjöls­verk­smiðja og sett upp raf­land­tengi­búnað fyrir fiski­skip sem væru spar­neytn­ari en áður og minnk­uðu olíu­notk­un.

„En öll þessi við­leitni til að nýta raf­orku og bera ábyrgð á lofts­lags­málum er stöðvuð af Alþingi sem kemur í veg fyrir end­ur­nýjun flutn­ings­kerfis raf­orku og raf­orku­skortur eykur aðeins á olíu­notk­un. Nú er svo komið að allur ávinn­ingur af millj­arða fram­lögum rík­is­ins til að raf­væða bíla­flot­ann hverfur þessa dag­ana út í and­rúms­loftið með olíu­reykn­um,“ sagði hann.

Spurði hann jafn­framt hvort ekki væri kom­inn tími til að lýsa yfir neyð­ar­á­standi í aðgerða­leysi á upp­bygg­ingu flutn­ings­kerfis raf­orku og mæta orku­skiptum með meiri fram­leiðslu raf­orku.