Sveitarstjórn Dalabyggðar ætlar að bjóða sveitarstjórn Húnaþings vestra annars vegar og sveitarstjórnum Stykkishólmsbæjar og Helgafellssveitar hins vegar til fundar til að ræða hvort að hefja skuli viðræður um mögulega sameiningu við Dalabyggð.
Leiði þeir fundir í ljós að vilji sé til sameiningarviðræðna verður tekin afstaða til þess hvort hafnar verði formlegar eða óformlegar sameiningarviðræður. Þá verður ákveðinn tímarammi fyrir þær viðræður og óskað eftir framlagi úr Jöfnunarsjóði sveitarfélaga til að styðja við verkefnið.
Þetta var samþykkt á fundi sveitarstjórnar Dalabyggðar í vikunni þar sem niðurstöður valkostagreiningar vegna skoðunar á sameiningarkostum var lögð fram.
Í frumvarpi til laga um breytingar á sveitarstjórnarlögum kemur fram að lágmarks íbúafjöldi sveitarfélags sé 1.000. Hafi íbúafjöldi verið lægri en það í þrjú ár samfleytt skuli ráðherra eiga frumkvæði að því að sameina það öðru eða öðrum nærliggjandi sveitarfélögum. Fjöldamörkin hafa verið umdeild og í fréttum RÚV á fimmtudag sagðist Sigurður Ingi Jóhannsson, samgöngu- og sveitarstjórnarráðherra, vera tilbúinn að falla frá ákvæði um lögbundinn lágmarksfjölda íbúa og yrðu 1.000 manna mörkin þá frekar viðmið en skylda. Þá sagðist hann einnig tilbúinn að skoða hugmyndir um hvernig ná mætti markmiðum frumvarpsins fram án þess að sú frumkvæðisskylda verði lögð á ráðherra að grípa til aðgerða fari íbúafjöldinn undir ákveðna tölu.
Íbúar í Dalabyggð eru í dag 673 talsins. Stærsti byggðarkjarninn er Búðardalur.
Verkefnishópur um sameiningarmál í Dalabyggð lagðist með aðstoð ráðgjafafyrirtækis í skoðun á sameiningarmöguleikum og lagði mat á ellefu sveitarfélög í því sambandi með það að markmiði að greina styrkleika, veikleika og tækifæri Dalabyggðar ef til sameiningar sveitarfélagsins kemur. Ákveðið var að kynna sex valkosti á íbúafundi:
Vesturland:
Borgarbyggð, Dalabyggð, Eyja- og Miklaholtshreppur og Skorradalshreppur.
Breiðafjörður:
Dalabyggð, Eyja- og Miklaholtshreppur, Grundarfjarðarbær, Helgafellssveit, Reykhólahreppur og Stykkishólmur.
Dalir, Stykkishólmur og Helgafellssveit:
Dalabyggð, Helgafellssveit og Stykkishólmur.
Dalir, Strandir, Reykhólar:
Árneshreppur, Dalabyggð, Kaldrananeshreppur, Reykhólahreppur og Strandabyggð.
Dalir, Strandir, Reykhólar og Húnaþing:
Árneshreppur, Dalabyggð, Húnaþing Vestra, Kaldrananeshreppur, Reykhólahreppur og Strandabyggð.
Dalir og Húnaþing:
Dalabyggð og Húnaþing vestra.
Verkefnishópurinn leggur til að áherslur Dalabyggðar í sameiningarviðræðum verði á að innviðir í Dalabyggð standi jafnir innviðum í þeim sveitarfélögum sem mögulega sameinast. Í því felst að grunnþjónusta, svo sem fræðsluþjónusta, aðstaða til íþróttaiðkunar, sérfræðiþjónusta við skóla, fólk með fötlun og aðra hópa, verði bætt, en ekki takmörkuð. Í Dalabyggð verði starfsstöð stjórnsýslu. Áhrif og aðkoma heimafólks að nærþjónustuverkefnum og stefnumótun verði tryggð.
Ákvörðun sveitarstjórnar Dalabyggðar að kanna frekar mögulega sameiningu við Húnaþing vestra annars vegar og Stykkishólmsbæjar og Helgafellssveitar hins vegar, rímar við niðurstöður íbúafundar þar sem kosið var um framkomna valkosti.
Í greiningu og mati á mögulegri sameiningu Dalabyggðar og Húnaþings vestra segir að lítil hefð sé fyrir samstarfi sveitarfélaganna í dag. Hins vegar séu sameiginlegir hagsmunir í umhverfis- og skipulagsmálum, íbúaþróun sé í jafnvægi, hjá báðum sveitarfélögunum sé góður rekstrarafgangur, fjárfestingageta góð og skuldahlutfall um 60 prósent. Þá sé áhersla lögð á matvælaframleiðslu í þeim báðum, að vöxtur í ferðaþjónustu hafi hingað til verið hægur og að bæta þurfi samgöngur um Hrútafjörð. Íbúafjöldinn er samanlagður 1.854.
Hvað viðkemur mögulegri sameiningu Dala, Stykkishólms og Helgafellssveitar kemur fram í valkostagreiningunni að íbúafjöldinn yrði samanlagður 1.936. Hefð er fyrir samstarfi þessara þriggja sveitarfélaga og þau eiga sameiginlegra hagsmuna að gæta í umhverfis- og skipulagsmálum. Þá sé rekstrarafgangur góður, fjárfestingageta ágæt en skuldahlutfall um 109 prósent. Atvinnulíf innan svæðisins er fjölbreytt og þar er m.a. að finna rannsóknarsetur. Orðið hefur vöxtur í ferðaþjónustu en bæta þurfi samgöngur um Skógarströnd.
