Aðilinn sem vill selja íslenskum skattayfirvöldum upplýsingar um fjármálalegar eignir íslenskra aðila í þekktum skattaskjólum vill fá 150 milljónir króna fyrir gögnin. Gangi íslensk yfirvöld ekki að því tilboði vill hann 2.500 evrur fyrir hvert mál, 375 þúsund krónur, en þau eru alls 416 talsins. Þetta kemur fram í tilkynningu á síðu fjármála- og efnahagsráðuneytisins.
Í tilkynningunni segir að embætti skattrannsóknarstjóra hafi með bréfi, sem var sent til ráðuneytisins 27. janúar síðastliðinn, upplýst að athugun þess hefði leitt í ljós að ekki væri mögulegt að ganga til samninga um kaup á gögnunum þannig að greiðslur yrðu háðar árangri af nýtingu þeirra. "Seljandi gagnanna sé á hinn bóginn reiðubúinn til að láta öll gögnin af hendi fyrir 150 milljónir króna, ellegar 2.500 evrur fyrir hvert mál, en þau eru alls 416 talsins. Jafnframt segir í bréfi embættis skattrannsóknarstjóra að skýra þurfi nánar atriði er lúta að hæfi seljanda".
Þá upplýsir ráðuneytið að það hafi, með bréfi, beint því til skattrannsóknarstjóra að embættið gangist fyrir athugun á því hvort fréttaflutningur af viðskiptaháttum svissneska útibús breska bankans HSBC, og eftir atvikum annarra banka, gefi tilefni til rannsókna að hálfu embættisins.
Tilkynning fjármála- og efnahagsráðuneytisins í heild sinni
"Hjá embætti skattrannsóknarstjóra hafa verið til athugunar gögn er kunna að varða fjármálalegar eignir íslenskra aðila í þekktum skattaskjólum. Meðal þess sem til skoðunar hefur verið er hvaða þýðingu slík gögn gætu haft fyrir þau verkefni sem embættið sinnir, hvort þeir sem hafa boðið gögnin séu til þess bærir að selja þau og hvort unnt yrði að árangurstengja greiðslu fyrir gögnin, líkt og fordæmi eru fyrir og embætti skattrannsóknarstjóra hafði áður talið koma til álita. Fyrir liggur að það er niðurstaða embættis skattrannsóknarstjóra eftir skoðun á sýnishorni af þeim upplýsingum sem boðnar hafa verið að kaup á gögnum geti mögulega nýst embættinu.
Fjármála- og efnahagsráðuneytið taldi rétt, í framhaldi af ábendingu og fundi með fulltrúum frá embætti skattrannsóknarstjóra, að láta reyna á þann möguleika að árangurstengja greiðslur þar sem fram hafði komið að til væru erlend fordæmi um slíkt fyrirkomulag. Ennfremur taldi ráðuneytið að gaumgæfa þyrfti sérstaklega hæfi seljanda.
Embætti skattrannsóknarstjóra hefur með bréfi dags. 27. janúar til fjármála- og efnahagsráðuneytsins upplýst að athugun þess hafi leitt í ljós að ekki sé mögulegt að ganga til samninga um kaup á gögnum þannig að greiðslur verði háðar árangri af nýtingu þeirra. Seljandi gagnanna sé á hinn bóginn reiðubúinn til að láta öll gögnin af hendi fyrir 150 milljónir króna, ellegar 2.500 evrur fyrir hvert mál, en þau eru alls 416 talsins. Jafnframt segir í bréfi embættis skattrannsóknarstjóra að skýra þurfi nánar atriði er lúta að hæfi seljanda.
Ráðuneytið áréttar að varðandi hæfi seljanda er einvörðungu vísað til þess að því eru skorður reistar á grundvelli fjárreiðulaga nr. 88/1997 og laga um bókhald nr. 145/1994 hvernig viðskiptum ríkisins við einkaaðila er háttað.
Skylda til mats á upplýsingum þeim sem í boði eru, að hversu miklu gagni þær geta komið við rannsókn á skattundanskotum og ákvörðun um kaup á þeim liggur hjá embætti skattarannsóknarstjóra en fjármála- og efnhagsráðuneytið er tilbúið að greiða fyrir kaupunum, verði það niðurstaða embættisins.
Til að styðja við hugsanlegar aðgerðir skattrannsóknarstjóra skipaði fjármála- og efnahagsráðherra starfshóp í desember sl. til að leggja mat á það hvort lagaheimildir skattyfirvalda til öflunar upplýsinga í baráttunni gegn skattsvikum væru fullnægjandi og hvort ástæða væri til að taka upp ákvæði um grið í íslensk skattalög, svipuð þeim sem eru í nágrannalöndunum. Niðurstöður starfshópsins munu meðal annars felast í drögum að frumvarpi og verður skilað eigi síðar en 15. febrúar 2015.
Upplýst skal að fjármála- og efnahagsráðuneytið hefur með bréfi beint því til embættis skattrannsóknarstjóra að það gangist fyrir athugun á því hvort fréttafluttningur af viðskiptaháttum svissneska útibús breska bankans HSBC, og eftir atvikum annnarra banka, gefi tilefni til rannsókna af hálfu embættisins."
