Fótbolti og pólitík

Einar Brynjólfsson og Einar Árni Friðgeirsson vilja gefa spillingu, sérhagsmunagæslu og pólitískum inngripum rauða spjaldið.

rautt spjald
Auglýsing

Það hefur verið skammt stórra högga á milli í íslenskri knatt­spyrnu und­an­farnar vik­ur. Kvenna­lands­liðið okkar hefur sýnt og sannað að það er inni­stæða fyrir þátt­töku þess í stór­mót­um, nú síð­ast með glæsi­legum sigri á sig­ur­sælasta lands­liði knatt­spyrnu­sög­unn­ar, því þýska, og með jafn­tefli við það tékk­neska. Rétt rúm­lega 340.000 manna eyland við heim­skauts­baug er á leið­inni með karla­lands­lið sitt á einn stærsta íþrótta­við­burð jarð­ar, HM í Rúss­landi næsta sum­ar, og sló tug­millj­óna­þjóðum með ríka knatt­spyrnu­hefð og marg­falt meiri burði til að halda úti öfl­ugu lands­liði ref fyrir rass. Hvernig getur þetta ger­st?  

Auð­velt er að grípa til þess að klappa þjóð­arsál­inni bara dug­lega á bak­ið, því við séum nú bara svona frá­bær.  Íslenska geð­veik­in, vík­inga­eðlið, sagan, menn­ingin og allur sá pakki.  Slíkar útskýr­ingar hrökkva þó skammt þar sem við vorum nákvæm­lega jafn geð­veik og nákvæm­lega jafn miklir vík­ingar í eðli okkar þegar við vorum ömur­leg í fót­bolta. Skýr­ing­anna verður að leita ann­ars stað­ar. 

Til­vilj­un, eða hvað?

Sann­leik­ur­inn er sá að þessi frá­bæri árangur er alls engin til­vilj­un, heldur afleið­ing ferlis sem hófst fyrir alvöru árið 2002, með með­vit­aðri stefnu­breyt­ingu innan KSÍ. Þjálf­ara­menntun var efld og alþjóð­lega vott­uð. Þjálfun yngri flokka fór úr því að vera unnin af lítt mennt­uðum áhuga­mönn­um, oft á tíðum for­eldrum eða öðrum aðstand­endum barn­anna í sjálf­boða­vinnu, yfir í að vera unnin af vel mennt­uðum knatt­spyrnu­þjálf­urum sem fengu greitt fyr­ir sína vinnu.

Einar Brynjólfsson.Veg­legum fjár­hæðum var veitt í upp­bygg­ingu inn­við­anna sem þarf til að iðka knatt­spyrnu allt árið um kring á 66. gráðu norð­ur. Fjöl­mörg knatt­spyrnu­hús, gervi­gras­vellir og meira en 130 minni sparkvellir voru reistir um land allt þar sem börn gátu leikið sér að vild.

Árangur KSÍ á sínu sviði á heims­vísu er eitt­hvað sem aðrar mennta­stofn­an­ir, hvort heldur sem er á grunn-, fram­halds- eða háskóla­stigi geta ekki einu sinni byrjað að láta sig dreyma um. Við erum ekki í heimsklassa í raun­vís­ind­um, lækn­is­fræði, félags­vís­ind­um, iðn- og tækni­fræði, list­námi, land­bún­að­ar­vís­indum né neinu öðru. Erlendar mennta­stofn­anir á þeim sviðum eru ekki á leið­inni í neinar píla­gríms­ferðir til Íslands til að yfir­heyra skóla­stjóra lands­ins um hvernig þeir geti breytt sínum skólum til að vera meira eins og við.  

En í okkar huga er þó stærsti kost­ur­inn við þetta knatt­spyrnu ævin­týri ekki árang­ur­inn sem slík­ur, knatt­spyrnu­legur eða þjóð­hag­fræði­leg­ur, heldur sú ein­falda stað­reynd að KSÍ hefur vísað þjóð­fé­lag­inu okkar veg­inn og sýnt okkur hverju er hægt að áorka þegar hlut­irnir eru gerðir vel, því aðferða­fræð­ina sem KSÍ hefur fylgt er hæg­lega hægt að yfir­færa á nokkurn veg­inn allt sem sam­fé­lag tekur sér fyrir hend­ur. 

Setjum okkur mark­mið

Einar Árni FriðgeirssonHvað ef við ein­settum okkur að innan ein­hvers ákveð­ins tímara­mma muni Íslend­ing­ur, eða mann­eskja menntuð á Íslandi verða til­nefnd til Nóbels­verð­launa? Eða hljóta Fields-orð­una, æðstu við­ur­kenn­ingu stærð­fræð­inn­ar? Eða sam­bæri­leg verð­laun í öðrum geirum? Hversu langt getum við náð ef vilj­inn er fyrir hendi, og hversu æðis­legt væri það ef við myndum ná jafn­góðum árangri í ein­hverju sem sann­ar­lega skiptir máli? Fyrir marga er knatt­spyrna líf­ið, en í víð­ara sam­hengi hlut­anna er hún nú samt ekk­ert annað en leikur spil­aður fólki til dægra­stytt­ing­ar.

Tökum eitt dæmi frá meg­in­landi Evr­ópu. Á svip­uðum tíma og KSÍ lagði af stað í sína veg­ferð setti Hol­land sér það mark­mið að fram­leiða tvö­falt meira af mat­vælum með helm­ingi minna álagi á nátt­úru­auð­lind­ir. Og viti menn, með sam­stilltu átaki rík­is, sveit­ar­fé­laga, einka­geirans og mennta­stofn­ana hefur þetta pínu­litla land slegið öll met í mat­væla­fram­leiðslu per hekt­ara af rækt­ar­landi og á sama tíma snar­minnkað notkun á vatni, áburði, sýkla­lyfj­um, skor­dýra­eitri og eig­in­lega öllu sem þarf til að fram­leiða mat­væli. Hol­lenskt hug­vit og tækni í land­bún­aði er nú flutt út til meira en 140 landa, og fólk flykk­ist til lands­ins til að nema við hol­lenska land­bún­að­ar­há­skóla.  

Í þessu verk­efni er þunga­miðjan sú sama og í stefnu KSÍ - fjár­fest­ing í mennt­un, mannauði og innvið­um.

Spill­ing, sér­hags­muna­gæsla og póli­tísk inn­grip

Áhan­gendur króat­ísku og tyrk­nesku lands­lið­anna, sem fóru ham­förum á sam­fé­lags­miðl­um, voru á einu máli um hvers vegna liðin þeirra hefðu ekki staðið sig sem skyldi í und­ankeppn­inni: spill­ing, sér­hags­muna­gæsla og póli­tísk inn­grip.

Auglýsing
Tyrkirnir kvört­uðu sáran undan því að liðið þeirra væri væng­brotið sökum þess að leik­menn sem ekki styddu Erdogan for­seta nægi­lega hávært opin­ber­lega hefðu verið settir út í kuld­ann, og Króat­arnir bölv­uðu knatt­spyrnu­sam­band­inu sínu í sand og ösku og töl­uðu ítrekað um spill­ingu innan knatt­spyrnu­sam­bands síns þar sem sér­hags­munir umboðs­manna, fjár­sterkra félags­liða og leik­mann­anna sjálfa væru tekin fram yfir hags­muni lands­liðs­ins og þar af leið­andi eyði­lagt liðs­heild­ina.  Í báðum til­fellum var morg­un­ljóst að þeim sem falið hafði verið það starf að berja saman besta mögu­lega lands­liðið fyr­ir sína þjóð höfðu ákveðið með­vitað að van­rækja það verk og í stað þess ákveðið að sinna ein­hverju allt öðru í stað­inn, sem þeir höfðu nákvæm­lega ekk­ert umboð til.    

Á Íslandi er allt gott

Hljómar þetta ekki óþægi­lega kunn­ug­lega þegar við hugsum um flest okkar kerfi hér á landi? Hvers vegna er öll stefnu­mörkun til fram­tíðar í skötu­líki. Hvers vegna hafa stjórn­völd ekki sett sér nein mark­mið fyrir fram­tíð­ina, og þá að sjálf­sögðu með sam­tali við þjóð­ina. Hvers vegna fel­ast aðgerðir stjórn­valda fyrst og fremst í því að bregð­ast við orðnum hlut?

Getur hugs­ast að hér séu að hluta til svip­aðar aðstæður og í ofan­greindum lönd­um? Rifjum upp nokkur mál sem benda til þess: Ógagn­sætt fjár­mála­vafstur Bjarna Bene­dikts­sonar og sein skýrslu­skil; skipan vina og vanda­manna í Lands­dóm; svokölluð leið­rétt­ing hús­næð­is­lána til þeirra sem þurftu ekki á henni að halda; ár­ang­urs­laus vinna sátta­nefndar um sjáv­ar­út­veg vegna þess að hags­muna­að­ilar hafa ákveðin stjórn­mála­öfl í vas­an­um, m.a. með veg­legum styrkj­um; til­burðir dóms­mála­ráð­herra við að reyna að koma í veg fyrir að nokkrar ungar stúlkur gætu fengið að vita hverjir hefðu skrifað upp á að mað­ur­inn sem mis­not­aði þær væri nú þegar öllu væri á botn­inn hvolft bara ágætis náungi. Með öðrum orð­um: spill­ing, sér­hags­muna­gæsla og póli­tísk inn­grip.

Er ekki kom­inn tími á rauða spjald­ið?

Höf­undar skipa 1. og 9. sæti á lista Pírata í Norð­aust­ur­kjör­dæmi.

Fyrir einu ári síðan: „Við eigum Ísland, það eina sem við eigum eftir að gera er að taka það“
Lífeyrissjóðir landsins eiga stóran hluta af íslensku atvinnulífi. Hávær krafa hefur lengi verið um að þeir verði virkari eigendur og nýti sér þau völd sem í því felast til að beita sér fyrir lífsgæðum sjóðsfélaga í nútíð ekki síður en í framtíð.
Kjarninn 21. september 2019
Bólusótt í hættu
Er réttlætanlegt að geyma veirur eins og bólusótt, sem geta valdið jafnmiklum mannskaða og raun ber vitni?
Kjarninn 21. september 2019
Tæknivarpið
Tæknivarpið
Tæknivarpið – Uppfærðar græjur, Sambandið og Apple Arcade
Kjarninn 21. september 2019
Birgir Birgisson
Reið hjól
Kjarninn 21. september 2019
Þjálfa þarf peningahund til að berjast gegn peningaþvætti
Embætti tollstjóra skortir bæði þekkingu og úrræði til að geta almennilega haft eftirlit með smygli á reiðufé til Íslands. Á meðal þeirra úrræða sem lagt er til að ráðist verði í er að þjálfa peningahund.
Kjarninn 21. september 2019
Klikkið
Klikkið
Klikkið - Að iðka mannréttindi
Kjarninn 21. september 2019
Athuga hvar eftirlitsaðilar gera ónauðsynlegar kröfur til matvæla
Umhverfisráðherra hefur hrundið af stað aðgerðum til að vinna gegn matarsóun á Íslandi. Meðal annars verður gerð athugun á því hvar eftirlitsaðilar gera mögulega ónauðsynlegur kröfur til matvælaöryggis sem ýtt gætu undir matarsóun.
Kjarninn 21. september 2019
Brim-flétta KS fagnaðarefni fyrir Skagfirðinga
Eftir að hafa keypt hlutabréf í Brimi, og selt nokkrum vikum síðar, hefur Kaupfélag Skagfirðinga styrkt stöðu sína.
Kjarninn 21. september 2019
Meira úr sama flokkiAðsendar greinar