Sú ákvörðun Icelandair Group, móðurfélags Icelandair, að kaupa WOW air átti sér ekki langan aðdraganda. Hugmyndin hafði reyndar verið viðruð fyrir nokkrum vikum síðan þegar ljóst var að skuldabréfaútboð WOW air var að ganga afar illa, en alvöru viðræður hófust ekki fyrr en á laugardag. Þær fóru síðan á fullt í gærmorgun og unnið var að samkomulaginu í alla nótt. Það lá síðan fyrir í morgun og var tilkynnt til Kauphallar Íslands klukkan 12:49 í dag.
Viðmælendur Kjarnans eru einróma sammála um að kaupin séu björgunaraðgerð til þess að bregðast við erfiðri fjárhagsstöðu WOW air, sem gat illa lifað af liðin mánaðamót. Ef ekki hefði verið gripið til aðgerða nú hefði rekstur WOW air líkast til stöðvast.
Ráðamönnum hérlendis var haldið upplýstum um stöðuna um helgina. Þá hefur Samgöngustofa, sem gefur út flugrekstrarleyfi og hefur eftirlit með þeim flugfélögum sem hafa leyfi til að starfa, verið þátttakandi í ferlinu.
Kaupin, og ástæður þeirra, eru þó á skjön við þau skilaboð sem send hafa verið úr herbúðum WOW air opinberlega undanfarnar vikur og mánuði, eða frá því að opinberað var að WOW air ætlaði að sækja sér nokkra tugi milljón dali með útgáfu skuldabréfa. Meðal þess sem opinberlega hafði verið sagt, var að félagið stefndi að skráningu á markað í Frankfurt og að framundan væri mikill vöxtur vegna fyrirhugaðs Asíu-flugs.
Illa gekk að fá fjárfesta til að taka þátt í útboðinu en því var þó lokað með herkjum 18. september. Vextirnir sem WOW air samþykkti að greiða af skuldabréfunum voru þó þeir hæstu sem nokkurt flugfélag í Evrópu greiddi. Vaxtakjörin, níu prósent ofan á þriggja mánaða Euribor vexti, voru hærri en vextir voru í útboðum hjá Air Berlin, Finnair, Norwegian Air, Air France, British Airways og Lufthansa sem ráðist hefur verið í á tímabilinu 2013 til 2018.
Áður voru hæstu vextir sem evrópskt flugfélag hafði samþykkt að greiða 8,5 prósent í útboði sem Air Berlin fór í árið 2017 þegar fyrirtækið sótti 125 milljón evra með víkjandi skuldabréfaútgáfu. Air Berlin fór í greiðslustöðvun í ágúst í fyrra og hætti starfsemi 27. október 2017. Önnur flugfélög sem gáfu út skuldabréf á tímabilinu greiða, samkvæmt frétt Bloomberg um málið, 5,1 til 7,9 prósent vexti.
Í viðtali við Financial Times sem birtist daginn áður en tilkynnt var um að skuldabréfaútboðinu hefði verið lokað sagði Skúli Mogensen , stofnandi, aðaleigandi og forstjóri WOW air, að félagið ætlaði að safna um 200 til 300 milljónum dollara í nýtt hlutafé í hlutafjárútboði sem fyrirtækið ætlar að ráðast í á næstu tveimur árum.
Af því hlutafjárútboði verður aldrei.
Ekki var greint frá því hverjir hefðu tekið þátt í skuldabréfaútboðinu að öðru leyti en að það væri bæði innlendir og erlendir fjárfestar. Þessi hópur var með belti og axlabönd varðandi WOW air þar sem kaupum þeirra fylgdi breytiréttur á skuldabréfunum í hlutafé ef rekstur WOW air reyndist verri en lagt var upp með í áætlunum. Hann reyndist verri. Mun verri.
Vegna skuldabréfaútboðsins var heimild um að hækka hlutafé WOW air um 81 milljón hluta, sem er um þriðjungur alls hlutafjár eftir hækkun, samþykkt í stjórn 24. september síðastliðinn.
Samkvæmt heimildum Kjarnans kom krafan um að fara í viðræður við Icelandair Group um kaup á WOW air frá lánardrottnum félagsins, m.a. þeim sem höfðu tekið þátt í útboðinu. Arion banki er helsti lánardrottinn WOW air hérlendis og hefur því án efa leikið lykilhlutverk í þeirri kröfugerð. Arion banki hefur ekki viljað upplýsa um hvort hann, eða sjóðstýringarfyrirtækið Stefnir, hafi tekið þátt í skuldabréfaútboðinu hjá WOW air.
Í tilkynningunni sem send var til Kauphallar í morgun kemur fram að Icelandair Group muni greiða 5,4 prósent af hlutafé sínu fyrir WOW air. Það getur þó farið svo að mun minna verði greitt fyrir það.
Fyrir liggur að einhverjir kröfuhafar WOW air, nýttu sér breytirétt og breyttu víkjandi lánum í hlutafé áður en viðræðurnar fóru af stað munu fá 1,8 prósent hlut í sameinuðu félagi. Ekki hefur verið greint frá því hverjir þeir kröfuhafar eru en líklegt er að þar sé um Skúla Mogensen, að minnsta kosti að hluta, að ræða.
Þá er gengið út frá því að aðrir hluthafar, sem er félagið Títan fjárfestingar í eigu Skúla Mogensen, muni fá um 3,5 prósent hlut í Icelandair. Það gagngjald er þó bundið niðurstöðu áreiðanleikakönnunar. Sýni slík könnun að staða WOW air sé betri en reiknað er með getur hlutur stofnandans farið upp í 4,8 prósent. Sýni hún mun verri stöðu getur Skúli setið uppi með að fá ekkert til viðbótar fyrir WOW air.
