Hluta­bréf í jap­anska félag­inu Japan Post Hold­ing, sem til þessa hefur verið alfarið í eigu jap­anska rík­is­ins, voru tekin til við­skipta í kaup­höll­inni í Japan í dag, og hækk­aði gengi bréf­anna um 26 pró­sent frá skrán­ing­ar­gengi. Fjár­festar sýndu þess­ari skrán­ingu mik­inn áhuga og náði jap­anska ríkið sér sam­tals í tæp­lega tólf millj­arða Banda­ríkja­dala, jafn­virði 1.700 millj­arða króna, með skrán­ingu á mark­að.

Skrán­ingin á Japan Post Hold­ing er sú stærsta frá því kín­verski vef­versl­un­ar­ris­inn Ali­baba var skráður á markað í Banda­ríkj­unum, í sept­em­ber í fyrra.

Jap­anska ríkið seldi um ell­efu pró­sent hlut í bank­anum Japan Post Bank og trygg­ing­ar­fé­lag­inu Japan Post Ins­urance, en þessi félög eru dótt­ur­fé­lög Japan Post Hold­ing. 

Með þess­ari sölu og skrán­ingu, hyggj­ast japönsk stjórn­völd fjár­magna áætlun sem meðal ann­ars miðar að því ljúka end­ur­reisn­ar­starfi vegna eyði­legg­ingar sem jarð­skjálfti og flóð­bylgja í kjöl­farið skildu eftir sig árið 2011. 

Sala á eign­ar­hlutum í Japan Post Hold­ing, hófst form­lega fyrir um ára­tug, en þá voru smáir eign­ar­hlutir seldir til fag­fjár­festa. Félagið heldur meðal ann­ars um stóran hlut af hús­næð­is­lánum Jap­ans, og hefur rík­is­stjórn Shinzo Abe, for­sæt­is­ráð­herra, það á stefnu­skrá sinni að selja hluti rík­is­ins í félag­inu á næstu árum, eftir því sem aðstæður leyfa.