Halldór Bjarkar Lúðvígsson, framkvæmdastjóri fjárfestingabankasviðs Arion banka, segir ásakanir Hreiðars Más Sigurðssonar, fyrrum forstjóra Kaupþings, um að hann hafi selt hlutabréf í Exista fyrir hrun á grundvelli innherjaupplýsinga ekki vera réttar. Halldór Bjarkar segist aldrei hafa selt hlutabréf í Exista. Hann hafi hins vegar selt bréf í Kaupþingi eftir þjóðnýtingu Glitnis en að sú sala hafi ekki byggt á innherjaupplýsingum. Þetta kemur fram í yfirlýsingu sem Halldór Bjarkar sendi frá sér í dag.
Þar segir ennfremur: „Ég keypti bréf í Exista í hlutafjárútboði sem var haldið í tengslum við skráningu félagsins á hlutabréfamarkað á árinu 2006. Þau hlutabréf átti ég enn þegar bréf félagsins voru tekin úr viðskiptum á árinu 2010 í tengslum við nauðasamninga félagsins. Ég tapaði því þeim peningum sem ég hafði fjárfest í Exista líkt og aðrir fjárfestar. Hvað varðar sölu mína á bréfum í Kaupþingi nokkrum dögum eftir þjóðnýtingu Glitnis, þá byggði sú sala einungis á þeirri forsendu að við þjóðnýtingu Glitnis væri um gjörbreytt landslag að ræða á íslenskum fjármálamarkaði. Ákvörðun um þá sölu byggði ekki á neinum innherjaupplýsingum, enda var ég almennur starfsmaður í Kaupþingi með engan aðgang að innherjaupplýsingum. Eins og fram hefur komið sendi Hreiðar Már bréf á árinu 2011 til ýmissa aðila þar sem vakin var athygli á sölu minni á þessum hlutabréfum. Í kjölfar þessa bréfs fékk ég fyrirspurn frá FME um málið. Eftir að ég hafði svarað þeirri fyrirspurn taldi FME mig ekki hafa búið yfir innherjaupplýsingum og taldi ekki tilefni til frekari athugunar. Ég lít svo á að með þeirri ákvörðun hafi FME staðfest að umrædd sala hafi verið eðlileg og hafi þar með hreinsað mig af þessum ásökunum. Að gefnu tilefni vil ég að lokum ítreka það sem áður hefur komið fram og verið staðfest af embætti sérstaks saksóknara. Engir samningar hafa verið gerðir milli mín og embættis sérstaks saksóknara um að fallið verði frá málsókn á hendur mér gegn því að ég beri vitni. Á öllum stigum málsins hef ég einvörðungu, eins og mér ber skylda til, svarað spurningum embættisins eftir bestu getu."
Hreiðar Már hefur einnig ásakað Halldór Bjarkar um að hafa samið sig frá ákæru í hinu svokallaða CLN-máli sem nú stendur yfir gegn því að bera vitni. Kjarninn greindi frá því fyrr í vikunni að Halldór Bjarkar segi það aldrei hafa verið rætt milli hans og starfsmanna sérstaks saksóknara að fallið yrði frá ákæru gegn honum fyrir vitnisburð í málinu.
Samkvæmt upplýsingum Kjarnans hafa tveir menn fengið réttarvernd gegn ákæru í hrunmálum þar sem upplýsingar bentu til þess að þeir hafi brotið af sér, gegn því að þeir veittu saksóknara upplýsingar sem styrkti málatilbúnað hans. Annar mannanna, Rósant Már Torfason, hlaut slíka réttarvernd árið 2009. Hinn, Magnús Pálmi Örnólfsson, hlaut réttarverndina með bréfi frá ríkissaksóknara í febrúar 2014. Hann hafði áður haft réttarstöðu grunaðs manns í Stím-málinu svokallaða. Þeir störfuðu báðir fyrir Glitni fyrir hrun. Halldór Bjarkar hefur því ekki hlotið slíka réttarvernd.
