Don­ald Trump er lyg­ari árs­ins að mati banda­rísku stað­reynda­vakt­ar­innar Politifact, sem kannar stað­hæf­ingar stjórn­mála­manna í Banda­ríkj­un­um, og hefur meðal ann­ars hlotið Pulitzer verð­laun fyrir störf sín. 

Politifact velur venju­lega eina ákveðna lygi, en í þetta skipti gat rit­stjórnin ekki valið úr þeim fjöl­mörgu lygum sem Trump lét út úr sér á árinu, að sögn Arons Sharock­man, fram­kvæmda­stjóra Politifact. "Hann hefur fært fram margar stórar og djarfar yfir­lýs­ing­ar. Því miður eru flestar þeirra óná­kvæm­ar." Ummæli Trump vermdu líka þrjú efstu sætin í kosn­ingu les­enda. 

Hann sagði meðal ann­ars að þús­undir manna hafi fagnað í New Jersey þegar tví­bura­t­urn­arnir í New York féllu. Þetta var rann­sakað ítar­lega af Politifact og ekk­ert rennir stoðum undir þessa stað­hæf­ingu Trump. Hún var því metin hauga­lygi (Pants on Fire) af Politifact og var lygi árs­ins að mati les­enda. 

Hann sagði einnig að Mexíkó væri að senda vont fólk, nauð­gara og eit­ur­lyfja­sala, yfir landa­mærin til Banda­ríkj­anna, sem er líka hauga­lyg­i. 

Þá sagði Trump á Twitter að menn af afrískum upp­runa bæru ábyrgð á yfir 80 pró­sentum morða á hvítu fólki í Banda­ríkj­un­um. Það er hauga­lyg­i. 

Í fyrra var lygi árs­ins valin ýkjur um Ebólu í Banda­ríkj­un­um. Aðeins tveir létu lífið í tengslum við Ebólu-veiruna í fyrra en þrátt fyrir það var mik­ill hræðslu­á­róður í gangi, bæði hjá stjórn­mála­mönnum og álits­gjöfum í fjöl­miðl­u­m.