Ólafur Ragnar Grímsson, forseti Íslands, segist hafa byrjað að velta því fyrir sér strax 5. maí, þegar Guðni Th. Jóhannesson tilkynnti um forsetaframboð sitt, að það væru að myndast kringumstæður þar sem „að þjóðin væri loksins eftir fjögurra mánaða leit að finna sér einstakling sem gæti notið nægilegs stuðnings.“ Þá hafi hann sett á blað nokkrar hugleiðingar út frá eigin rökstuðningi fyrir því að bjóða sig aftur fram og daginn eftir hafi hann gert slíkt hið sama. Þegar Davíð Oddsson ákvað síðan að bjóða sig fram hafi röksemdarfærslan leitt sig að þeirri skýru niðurstöðu að ekki væri lengur þörf fyrir Ólaf Ragnar að bjóða sig fram til embættis forseta á ný. Þetta kemur fram í viðtali við Ólaf Ragnar í Morgunblaðinu í dag.
Þar segir forsetinn að það sé „ekki aðeins merkilegt nú, heldur í raun og veru einstakt í sögu forsetakosninga og lýðveldisins, að jafn öflugur fyrrverandi forsætisráðherra og fremsti fræðimaður þjóðarinnar gangi fram á völlinn og gefi kost á sér til að sinna þessu embætti sem þeir báðir hafa haft langvarandi tengsl við, þótt með ólíkum hætti sé.“
Í viðtalinu segir Ólafur Ragnar að umfjöllun um aflandsfélagaeign Dorritar Moussaieff, eiginkonu hans, hafi ekki haft neitt að gera með ákvörðun hans um að draga sig í hlé. Sú umfjöllun hafi verið full af rangfærslum sem nú hafi verið leiðréttar.
Í fyrstu skoðanakönnuninni sem birt hefur verið frá því að Guðni Th. tilkynnti framboð sitt á fimmtudag, könnun MMR sem birt var í gær, mældist stuðningur við hann 59,2 prósent. Ólafur Ragnar, sem hafði mælst með 52,6 prósent fylgi í skoðanakönnun MMR sem birt var 27. apríl, mældist nú með 25,3 prósent fylgi. Andri Snær Magnason mældist með 8,8 prósent fylgi, Halla Tómasdóttir með 1,7 prósent og Davíð Oddsson mælist með 3,1 prósent. Davíð var bætt inn sem svarmöguleika um leið og hann tilkynnti framboð sitt í gær, en 27 prósent svarenda í könnuninni fengu hann sem svarmöguleika.
Hætti við að hætta við að hætta við
Ólafur Ragnar sendi frá sér yfirlýsingu í gær þar sem fram kom að hann væri hættur við að bjóða sig aftur fram til embættisins. Þar sagði Ólafur Ragnar að það hafi orðið ljóst með atburðum síðustu daga að þjóðin eigi nú „kost á að velja frambjóðendur sem hafa umfangsmikla þekkingu á eðli, sögu og verkefnum forsetaembættisins; niðurstaða kosninganna gæti orðið áþekkur stuðningur við nýjan forseta og fyrri forsetar fengu við sitt fyrsta kjör. Við þessar aðstæður er bæði lýðræðislegt og eðlilegt, eftir að hafa gegnt embættinu í 20 ár, að fylgja í ljósi alls þessa röksemdafærslu, greiningu og niðurstöðu sem ég lýsti í nýársávarpinu. Ég hef því ákveðið að tilkynna með þessari yfirlýsingu þá ákvörðun mína að gefa ekki kost á mér til endurkjörs."
Þremur vikum áður, þann 18. apríl, hafði hann boðað til blaðamannafundar á Bessastöðum og tilkynnt að hann ætlaði fram í sjötta sinn. Ástæðan væri mikil óvissa í samfélaginu.
