Her­skólum verður lokað og her­inn verður settur beint undir varn­ar­mála­ráð­herra Tyrk­lands. Þetta til­kynnti for­seti lands­ins, Recep Tayyip Erdogan, í gær. 

Þá hefur 1.700 starfs­mönnum tyrk­neska hers­ins verið vikið úr honum í þess­ari viku. Fikri Isik, varn­ar­mála­ráð­herra lands­ins, segir að hreins­un­um innan hers­ins sé ekki enn lokið eftir mis­heppn­aða valda­ránstil­raun um miðjan júlí. Meðal þeirra sem hafa verið látnir fara frá hernum frá valda­ránstil­raun­inni eru 40% allra aðmírála og hers­höfð­ingja.  

„Her­inn okkar verður miklu sterk­ari með þessum nýju til­skip­un­um. Yfir­menn hers­ins munu heyra undir varn­ar­mála­ráð­herrann,“ ­sagði Erdogan, for­seti lands­ins, í sjón­varps­við­tali. „Her­skól­u­m verður lok­að, við munum koma á varn­ar­mála­há­skóla á veg­um ­rík­is­ins.“ Þá vill Erdogan að fleiri stofn­an­ir, eins og ­leyni­þjón­ust­an, verði látin heyra beint undir hann. Sömu sög­u er að segja af æðsta yfir­manni hers­ins. Til þess þyrfti að breyta stjórn­ar­skrá lands­ins. Auk­inn meiri­hluti á þing­inu verð­ur­ að sam­þykkja stjórn­ar­skrár­breyt­ing­ar, en ekki er talið lík­legt að mikil and­staða verði við það eins og aðstæður eru nú í Tyrk­land­i. 

Erdogan hefur einnig greint frá því að yfir tíu þús­und ­manns hafi verið hand­teknir eftir valda­ránstil­raun­ina um miðjan júlí.