Formaðurinn hefur ekki lesið gagnrýni Orkustofnunar

Formaður verkefnisstjórnar rammaáætlunar ætlar ekki að tjá sig um gagnrýni Orkustofnunar fyrr en allar umsagnir eru komnar fram. Hann segir líklega margar góðar ábendingar í skýrslu OS, en stofnunin fái ekki meiri athygli en aðrir.

Sunna Valgerðardóttir 3. ágúst 2016

Formaður verkefnisstjórnar rammaáætlunar, Stefán Gíslason, hefur ekki lesið skýrslu Orkustofnunar (OS) þar sem aðferðir verkefnisstjórnarinnar við þriðja áfanga verndar- og orkunýtingaráætlun stjórnvalda er harðlega gagnrýnd. Stefán segir í samtali við Kjarnann að frestur til þess að skila inn athugasemdum vegna skýrsludraga um þriðja áfanga renni út í kvöld og gagnrýni OS verði ekkert tekin fyrir sérstaklega.

OS vill fleiri kosti í nýtingu

Í lok síðasta mánaðar sendi OS erindi ásamt fylgiskjali með gagnrýni stofnunarinnar til verkefnisstjórnar. Það er meðal annars mat OS að aðferðir verkefnisstjórnar séu á köflum ekki í samræmi við lög, greiningarvinna sé ófullnægjandi og utan skynsemismarka, mat sé byggt á of þröngu sjónarhorni, skortur sé á samræmi í einkunnagjöf og flokkun handahófskennd og órökstudd. OS vill til að mynda setja mun fleiri virkjanakosti í nýtingarflokk heldur en verkefnisstjórnin.

Stefán Gíslason, formaður verkefnisstjórnar rammaáætlunar

„Orkustofnun fær ekkert meiri athygli en aðrir sem senda inn umsagnir,“ segir Stefán. „Það mun sennilega koma mikið af gagnrýni í umsögnum og þær verða allar teknar fyrir sem heild. Það eru örugglega gagnlegar ábendingar í umsögn Orkustofnunar og þær verða teknar fyrir eins og aðrar athugasemdir sem berast.“ Stefán vill að öðru leiti ekki tjá sig um málið fyrr en umsóknarfrestur rennur út og allar umsagnir verði teknar saman.

Hlutverk verkefnisstjórnar rammaáætlunar er að veita ráðherra ráðgjöf um vernd og orkunýtingu landsvæða. Samkvæmt lögum um rammaáætlun ber umhverfis- og auðlindaráðherra, í samráði og samvinnu við ráðherra þann sem fer með orkumál, að leggja fram á Alþingi tillögu um flokkun virkjunarkosta eigi sjaldnar en á fjögurra ára fresti. Sex manns eru í verkefnisstjórninni, tveir skipaðir án tilnefningar og fjórir skipaðir af stjórnvöldum og sveitarfélögum. Verkefnisstjórnin er skipuð til fjögurra ára í senn. Núverandi verkefnisstjórn tók við árið 2013 og situr til 2017.

Við þurfum á þínu framlagi að halda

Þú getur tekið beinan þátt í að halda úti öflugum fjölmiðli.

Við sem vinnum á ritstjórn Kjarnans viljum hvetja þig til að vera með okkur í liði og leggja okkar góða fjölmiðli til mánaðarlegt framlag svo við getum haldið áfram að vinna fyrir lesendur, fyrir fólkið í landinu.

Kjarninn varð níu ára í sumar. Þegar hann hóf að taka við frjálsum framlögum þá varð slagorðið „Frjáls fjölmiðill fyrir andvirði kaffibolla“ til og lesendur voru hvattir til að leggja fram í það minnsta upphæð eins kaffibolla á mánuði.

Mikið vatn hefur runnið til sjávar á þeim níu árum sem Kjarninn hefur lifað. Í huga okkar á Kjarnanum hefur þörfin fyrir fjölmiðla sem veita raunverulegt aðhald og taka hlutverk sitt alvarlega aukist til muna.

Við trúum því að Kjarninn skipti máli fyrir samfélagið.

Við trúum því að sjálfstæð og vönduð blaðamennska skipti máli.

Ef þú trúir því sama þá endilega hugsaðu hvort Kjarninn er ekki allavega nokkurra kaffibolla virði á mánuði.

Vertu með okkur í liði. Þitt framlag skiptir máli.

Ritstjórn Kjarnans: Sunna Ósk Logadóttir, Þórður Snær Júlíusson, Erla María Markúsdóttir, Arnar Þór Ingólfsson, Eyrún Magnúsdóttir og Grétar Þór Sigurðsson.

Já takk, ég vil styrkja Kjarnann!

Orðafjöldi: 375 Færslan birtist fyrst: 3. ágúst 2016, kl. 14:00