Frá og með 1.sept­em­ber 2016 þurfa við­skipta­vinir 365 sem eru í áskrift­ar­leið­inni Enda­laus GSM að greiða tvö þús­und krónur ef þeir nota meira en 30 GB á mán­uði. Þá hækka þeir þakið upp í 100 GB. Þegar leiðin var var kynnt í febr­úar síð­ast­lið­inn þá kom fram að áskrif­endur hennar myndu „fá ótak­mark­aðar mín­útur og SMS óháð því hvaða sím­fyr­ir­tæki mót­tak­andi sím­tals­ins er. Enda­laust gagna­magn fylgir áskrift­ar­leið­inni en fyrir þetta greiða not­endur 2.990 krónur á mán­uð­i.“ Þetta kemur fram á til­kynn­inga­síðu 365, þar sem verð­breyt­ingar á vörum og þjón­ustu fyr­ir­tæk­is­ins eru birt­ar.

Á sama tíma mun verð í áskrift­ar­leið­inni Enda­laus heima­sími hækka úr 1.990 krónum í 2.490 krón­ur.

365 hefur boðið upp á fjar­skipta­þjón­ustu með síma og inter­neti frá haustinu 2013. Á far­síma­mark­aði var fyr­ir­tækið með 3,4 pró­sent mark­aðs­hlut­deild í lok síð­asta árs og við­skipta­vinir þess sam­tals 14.497 tals­ins, sam­kvæmt töl­fræði­skýrslu Póst- og fjar­skipta­stofn­unar. 365 GSM er á dreifi­kerfi Sím­ans, sem þýðir að fyr­ir­tækið kaupir aðgang að því kerfi fyrir við­skipta­vini sína.

Á sama tíma og Enda­laust GSM var kynnt var greint frá því að netá­skrif­endur 365 myndu einnig fá ótak­markað nið­ur­hal. Með völdum til­boðs­pökk­um, sem inni­halda einnig áskriftir að sjón­varps­stöðvum 365, býðst við­skipta­vinum fyr­ir­tæk­is­ins nú að greiða eitt þús­und krónur á mán­uði ofan á áskrift­ar­gjald fyrir inter­net­ið. Við bæt­ist aðgangs­gjald upp á nokkur þús­und krón­ur.

365 missti mark­aðs­hlut­deild á inter­net­mark­aði á árinu 2015,  þegar hlut­­fall hennar fór úr 13 pró­­sentum í 12,6 pró­­sent. Við­­skipta­vinum fyr­ir­tæk­is­ins í inter­­net­­þjón­­ustu fjölg­aði úr 15.551 í 15.665, eða um 114 tals­ins.