Francois Hollande, for­seti Frakk­lands, sagði í ávarpi sínu á alls­herj­ar­þingi Sam­ein­uðu þjóð­anna í gær að alþjóða­sam­fé­lagið þyrfti að stilla til friðar í borg­ar­stríð­inu í Sýr­landi. Annað yrði því til „ævar­andi skammar“ og nauð­syn­legt væri að taka höndum sam­an, og grípa inn í atburða­rás­ina. 

Hollande, sem flutti ávarpið með til­finn­inga­þrungnum hætti, sagði að skelf­ingin í land­inu væri nán­ast ólýs­an­leg. „Nóg er nóg,“ sagði Hollande. Efna­vopnum væri beitt, sprengjum varpað á lestir hlaðnar hjálp­ar­gögn­um, óbreyttir borgar væru að strá­felldir í loft­árásum og hern­aði á jörðu niðri. 

Nauð­syn­legt væri að fá fleiri þjóðir að hjálp­ar­starfi í land­inu, og auka þung­ann í póli­tískum við­ræðum sem geti leitt til frið­ar. 

Barack Obama Banda­ríkja­for­seti tal­aði fyrir því að borg­ara­stríðið í Sýr­landi yrði ekki leyst með hern­aði, heldur með póli­tískum við­ræð­um. Þær yrðu að vega þyngst, og þar geti margar þjóðir - stórar og smáar - lagt mikið af mörk­um. En hann lagði mikla áherslu á að Banda­ríkin væru í lyk­il­hlut­verki, og Rússar einnig. 

John Kerry, utan­rík­is­ráð­herra Banda­ríkj­anna, átti í gær fund með Sergei Lavrov, utan­rík­is­ráð­herra Rúss­lands, um ástandið í Sýr­landi eftir að vopna­hlé fór þar út um þúfur í dag. Kerry sagði við frétta­menn að mögu­leiki á vopna­hléi væri enn til stað­ar, eftir fund­inn. 

Áður en borg­ara­stríðið í Sýr­landi braust út bjuggu 22,5 millj­ónir  í land­inu, en talið er að meira en helm­ingur þeirra, eða um 12 millj­ón­ir, séu nú á flótta, ýmist utan eða innan lands­ins.