Hill­ary Clint­on, for­seta­fram­bjóð­andi Demókra­ta­flokks­ins, seg­ist von­ast til þess að Don­ald Trump, verð­andi for­seti Banda­ríkj­anna, verði far­sæll for­seti. Hún segir úrslitin í for­seta­kosn­ing­unum í gær ekki hafa verið þau sem hún hefði von­ast eftir eða vilj­að, og henni þyki það leitt að hafa tap­að. 

„Ég veit hversu von­svikin þið eruð af því að ég er það lík­a,“ sagði hún meðal ann­ars við stuðn­ings­menn sína í fyrstu ræð­unni eftir að ljóst varð að hún tap­aði for­seta­kosn­ing­un­um. „Þetta er sárs­auka­fullt og það mun vera það um langa hríð.“ Veru­leik­inn væri sá að Trump yrði for­seti og það þyrfti að gefa honum tæki­færi til að sanna sig. 

Clinton lagði áherslu á gildin sem hún og Demókra­ta­flokk­ur­inn stæðu fyr­ir, frelsi og jafn­rétti. Það þyrfti að gera allt til að tryggja jöfn rétt­indi og vernda þyrfti landið og líka alla jörð­ina. Nú væri það skylda þeirra sem borg­ara að gera sitt til að byggja sterk­ari og rétt­lát­ari Banda­ríki. „Við trúum því að banda­ríski draum­ur­inn sé nógu stór fyrir alla.“ Karla og kon­ur, fólk af ólíkum kyn­þátt­um, með ólíkar kyn­hneigðir og svo fram­veg­is. 

„Ég er stolt og þakk­lát fyrir þessa frá­bæru kosn­inga­bar­áttu sem við háðum sam­an. Þið eruð dæmi um það besta í Banda­ríkj­unum og að vera ykkar fram­bjóð­andi er ein­hver mesti heiður sem mér hefur hlotn­ast í líf­in­u.“  

Clinton sagði einnig að bar­áttan hafi aldrei snú­ist um eina mann­eskju eða einar kosn­ing­ar, heldur um gildi Banda­ríkj­anna. Það hafi komið í ljós að banda­ríska þjóðin sé enn klofn­ari en hún og hennar fólk hafi hald­ið. 

Hún þakk­aði fjöl­skyldu sinni og vara­for­seta­efni sínu, og öllu sínu teymi og stuðn­ings­mönn­um. Þá þakk­aði hún for­seta­hjón­unum Barack og Michelle Obama fyrir þeirra störf í átta ár. „Landið okkar stendur í mik­illi þakk­ar­skuld við ykk­ur.“ Hún tal­aði sér­stak­lega til ungs fólks og kvenna. Hún sagð­ist hafa varið öllu sínu lífi í bar­áttu fyrir betri heimi og því fylgdu bæði sigrar og töp. „Þetta er sárs­auka­fullt, en gerið það, aldrei hætta að trúa því að bar­áttan fyrir því sem er rétt sé þess virð­i.“ 

Við konur sagði hún að ekk­ert hefði gert hana stolt­ari en að vera full­trúi þeirra og braut­ryðj­andi. „Ég veit að við erum ekki búnar að brjóta þetta hæsta gler­þak í heimi, en ein­hvern tím­ann ger­ist það og von­andi fyrr en seinna.“