Flestir lands­menn bera mikið traust til frétta­miðla RÚV. Alls segj­ast 69 pró­sent þeirra treysta frétta­stofu RÚV og 67 pró­sent vef henn­ar, rúv.is. Fæstir van­treysta einnig RÚV, en 13 pró­sent segj­ast van­treysta frétta­stof­unni og 14 pró­sent RÚV.is. Kjarn­inn er sá íslenski mið­ill sem íslenskir fjöl­miðla­not­endur van­treysta minnst utan frétta­miðla RÚV. 21 pró­sent aðspurðra sögð­ust bera frekar eða mjög lítið traust til Kjarn­ans. Þetta kemur fram í nýrri könn­un MMR um traust til fjöl­miðla.

Traust til Kjarn­ans eykst frá því að könn­unin  var síð­ast gerð, í des­em­ber 2014. Nú treysta 31 pró­sent Kjarn­anum en 27 pró­sent gerðu það árið 2014.  Kjarn­inn situr í sjö­unda sæti yfir þá miðla sem njóta mest trausts á Íslandi og er sá eini af efstu átta miðlum lands­ins sem bætir við sig trausti frá 2014. Frétta­miðlar RÚV, frétta­stofa Stöðvar 2, mbl.is, Morg­un­blað­ið, Vís­ir.is og Frétta­blaðið tapa öll trausti frá síð­ustu mæl­ingu. Frétta­tím­inn bætir tölu­verðu trausti við sig milli mæl­inga. Hann mæld­ist  með 18 pró­sent traust 2014 en er nú með 25 pró­sent. 

Van­traust eykst gagn­vart öllum fjöl­miðlum lands­ins. Eina und­an­tekn­ingin er Stund­in, en traust og  van­traust til þess mið­ils er nú mælt í fyrsta sinn. Alls sögð­ust 26 pró­sent treysta Stund­inni en 29 pró­sent segj­ast van­treysta henni. Mest er van­traust­ið ­gagn­vart miðlum þeirra miðla sem heyra undir Press­una og DV, en þeim er stýrt af Birni Inga Hrafns­syni, útgef­anda Vef­pressunn­ar. Alls segj­ast 66 pró­sent aðspurðra, eða tveir af hverjum þrem­ur, van­treysta DV og DV.is og 48 ­pró­sent van­treysta Press­unni. Þessir þrír miðlar er líka þeir sem fæstir treysta. Alls segj­ast ell­efu pró­sent treysta Press­unni, átta pró­sent DV.is og sjö pró­sent DV. Traust á Press­una eykst frá síð­ustu könnun en dregst veru­lega saman á miðla DV.

Hægt er að sjá allar nið­ur­stöð­urnar úr könn­un MMR hér.