Raun­á­vöxtun Líf­eyr­is­sjóðs verzl­un­ar­manna var nei­kvæð um 1,2 pró­sent í fyrra. Þar skiptir mest máli ann­ars vegar að raun­á­vöxtun á inn­lendu hluta­bréfa­safni sjóðs­ins var nei­kvæð um tvö pró­sent og að raun­á­vöxtun erlendrar verð­bréfa­eign­ar, sem er um 26 pró­sent af eignum sjóðs­ins, var nei­kvæð um 9,7 pró­sent vegna mik­illar styrk­ingar íslensku krón­unn­ar. Á móti kom að raun­á­vöxtun á skulda­bréfa­eign sjóðs­ins var jákvæð um 4,4 pró­sent. Ávöxtun sjóðs­ins í heild var jákvæð um 0,9 pró­sent. Þetta kemur fram í afkomutil­kynn­ingu sjóðs­ins sem send var út í gær. 

Allt þetta leiddi til þess að trygg­inga­fræði­leg staða Líf­eyr­is­sjóðs verzl­un­ar­manna versn­aði umtals­vert á síð­asta ár. Hún er nú 4,2 pró­sent en var 8,7 pró­sent árið áður. Breyt­ing­arnar skýr­ast einkum á slakri ávöxtun síð­asta árs og því að lífaldur sjóðs­fé­laga er að hækka.

Líf­eyr­is­sjóður verzl­un­ar­manna er ásamt Líf­eyr­is­sjóði starfs­manna rík­is­ins (LSR) stærsti líf­eyr­is­sjóður lands­ins. Greið­andi sjóð­fé­lagar voru um 50 þús­und á síð­asta ári og námu iðgjalda­greiðslur til sjóðs­ins um 25 millj­örðum króna. Eignir sjóðs­ins nema nú um 602 millj­örðum króna.

Um 22 pró­sent af eignum sjóðs­ins, 132,4 millj­arðar króna, eru bundnar í inn­lendum hluta­bréf­um. Heild­ar­virði skráðra félaga í Kaup­höll Íslands er oft­ast nær um eða yfir eitt þús­und millj­arðar króna um þessar mundir og því ljóst að Líf­eyr­is­sjóður verzl­un­ar­manna er stór leik­andi á því sviði. Sjóð­ur­inn er á meðal stærstu hlut­hafa í Eik fast­eigna­fé­lagi, Reit­um, Sím­an­um, HB Granda, N1, TM, VÍS, Fjar­skiptum (Voda­fone á Ísland­i), Eim­skip, Reg­inn, Hög­um, Nýherja, Icelandair og Mar­el. Eigna­flokk­ur­inn hefur gefið sjóðnum mjög góða ávöxtun á und­an­förnum árum, þ.e. þangað til í fyrra þegar raun­á­vöxtun var nei­kvæð.

Mesta verð­fallið hefur verið á hluta­bréfum í Icelanda­ir. Líf­eyr­is­­sjóður verzl­un­­ar­­manna er stærsti ein­staki hlut­hafi félags­ins með­14,7 pró­­sent hlut. Mark­aðsvirði bréfa í Icelandair hefur lækkað um tæp­lega 110 millj­arða króna frá því í apríl í fyrra, og er í dag um 83 millj­arðar króna. Þegar mark­aðsvirði Icelandair lækk­aði um 24 pró­sent á einum degi, eftir að félagið sendi frá sér afkomu­við­vör­un, sendi Líf­eyr­is­sjóður verzl­un­ar­manna frá sér til­kynn­ingu. Í henni var bent á að meiri­hluti þess hluta­fjár sem sjóð­­ur­inn á í Icelandair hafi verið keyptur árið 2010 á geng­inu 2,5, en það er nú 16,8 krónur á hlut. 

Vegið kaup­­gengi allra hluta í Icelandair sé 3,7 og miðað við það sé virði hluta­bréf­anna enn meira en fjór­falt kaup­virði þeirra. „Þegar tekið hefur verið til­­lit til 1.523 mkr arð­greiðslna er raun­á­vöxtun þess­­arar fjár­­­fest­ingar frá 2010 til dags­ins í dag 32,34 pró­sent, sem telst mjög góð afkom­a.“