Inn­flytj­endur mæta öðrum hindr­unum á Íslandi en í öðrum nágranna­löndum okk­ar, og þeim eru settar frek­ari skorð­ur. Þetta er meðal þess sem kemur fram í sjón­varps­þætt Kjarn­ans á Hring­braut í kvöld. 

Umfjöll­un­ar­efni þátt­ar­ins eru inn­flytj­enda­mál, en Pawel Bar­toszek, þing­maður Við­reisn­ar, er gestur þátt­ar­ins. Hann er annar tveggja þing­manna sem eru af erlendu bergi brotn­ir, og hann telur það skipta máli fyrir umræð­una. 

Pawel segir Ísland setja inn­flytj­endum frek­ari skorður en nágranna­ríkin á nokkrum svið­um. „Það er bara dót sem fólk talar ekki mikið um,“ segir Pawel. 

„Þessi krafa til dæmis um það í raun­inni að hjúkr­un­ar­fræð­ingur eigi að vera með íslenskan rík­is­borg­ara­rétt, í fram­kvæmd hefur verið slakað mjög á þessu en þetta er samt ennþá þannig í lög­un­um, þannig að það væri mjög auð­velt að fara til baka ef það yrði stefnu­breyt­ing. Það er einn hlut­ur.“ 

Annað dæmi sem Pawel tekur er um sjálf­stæðan atvinnu­rekst­ur. „Mjög víða eru útlend­ing­ar, eða inn­flytj­end­ur, mjög virkir í sjálf­stæðum atvinnu­rekstri vegna þess að þeir mæta oft for­dómum á hinum almenna vinnu­mark­aði eða hjá hinu opin­bera. Þess vegna spretta upp veit­inga­staðir eða annar rekst­ur, svona etnískur rekst­ur, en hér er í raun­inni í lögum að þeim sem hafa tíma­bundið dval­ar- eða atvinnu­leyfi er óheim­ilt að greiða sér reiknað end­ur­gjald.“ 

Þetta sé hindr­un. „Þannig að það er ekki fyrr en menn eru búnir að vera á Íslandi í þrjú, fjögur ár og eru komnir með var­an­legt dval­ar­leyfi sem þeir mega opna pít­sa­stað, ef þeir eru frá löndum utan Evr­ópska efna­hags­svæð­is­ins. Þetta vita ekki margir og þetta er ekki þannig á hinum Norð­ur­lönd­un­um.“