Eignir í eigu Skúla Gunn­ars Sig­fús­son­ar, sem oft­ast er kenndur við Subway, hafa verið frystar sam­kvæmt ákvörðun Sýslu­manns­ins á höf­uð­borg­ar­svæð­inu þar um, frá 19. júlí síð­ast­liðn­um. Þetta sést á gögnum um mál­ið, sem eru end­ur­rit úr gerð­ar­bók, sem Kjarn­inn hefur undir hönd­um. Lög­maður Skúla og félags hans, Sjö­stjörn­unn­ar, stað­festi að kyrr­setn­ingin hefði átt sér stað.

Kyrr­setn­ingin er gerð í fjórum fast­eign­um, á Sel­fossi, Sel­tjarn­ar­nesi og tveimur í Ölf­usi.

Það var Sveinn Andri Sveins­son hrl. skipta­stjóri í þrota­búi EK 1923, sem áður hét Egg­ert Krist­jáns­son hf. heild­verzl­un, sem gerði kröfu um kyrr­setn­ingu eign­anna.

Erlendur Gísla­son hrl. lög­maður Skúla og félags hans, sem kyrr­setn­ingin bein­ist að, sagði í sam­tali við Kjarn­ann í morgun að kyrr­setn­ing­unni verði mót­mælt fyrir dómi. Hann segir að það sé hans mat, og umbjóð­anda hans, að engin rök séu fyrir þeim ásök­unum sem kyrr­setn­ingin byggir á, og að um málið verði tek­ist fyrir dómi.

Sveinn Andri hefur þegar kært Skúla og Guð­mund Hjalta­son, fram­kvæmda­stjóra Sjö­stjörn­unnar ehf., til hér­aðs­sak­sókn­ara fyrir auðg­un­ar­brot. „Brot kærðu lýsa sér í því að þeir hafi með ólög­­mæt­um hætti til­­einkað sér fyr­ir hönd Sjö­­stjörn­unn­ar kr. 21.316.582 með því að láta starfs­­mann Íslands­­­banka þann 15. mars 2016 milli­­­færa þá fjár­­hæð af bund­inni banka­­bók í eigu EK yfir á reikn­ing Sjö­­stjörn­unn­­ar,“ seg­ir m.a. í kær­unni frá því í jan­ú­ar.

Sam­kvæmt end­ur­rit­inu úr gerð­ar­bók, er meðal ann­ars tek­ist á um hversu mikið eignir eru skuld­sett­ar, miðað við veð­hlut­fallsút­reikn­inga, en sam­kvæmt bók­færðu virði eigna og skulda, þá nemur veð­hlut­fallið 91 pró­sent á til­teknum eignum sem nefndar eru í kyrr­setn­ing­ar­beiðni. Lands­bank­inn er helsti lán­veit­and­inn, sam­kvæmt upp­lýs­ing­unum sem koma fram í end­ur­rit­inu.

Guð­mundur mót­mælir því að þetta sé hið rétta hlut­fall, og segir mark­aðsvirði eigna vera 3,3 millj­arðar en ekki 1,8, eins bók­fært virði, sam­kvæmt sam­an­teknum árs­reikn­ingi fyrir síð­asta ár, ber með sér. 

Deilur vegna gjald­þrots EK 1923 hafa verið við­var­andi alveg frá því félagið var tekið til gjald­þrota­skipta á síð­asta ári, en Sveinn Andri skipta­stjóri telur að Skúli og félag hans hafi gætt sinna hags­muna á kostnað ann­arra kröfu­hafa, en því hefur verið mót­mælt kröft­ug­lega, eins og áður seg­ir. Ekki sér fyrir end­ann á þessum deil­um.

End­ur­rit úr gerð­ar­bók má sjá hér með­fylgj­andi, en þar eru helstu atriði þess­ara deilna rakin í nokkrum smá­at­rið­um.