Festa lífeyrissjóður og Frjálsi lífeyrissjóðurinn lögðu samtals 433 milljónir íslenskra króna til í hlutafjáraukningu United Silicon í apríl. Frá þessu er greint á mbl.is. United Silicon óskaði fyrr í vikunni eftir greiðslustöðvun og undirbýr sig nú fyrir nauðasamningsgerð við kröfuhafa sína.
Hlutaféð var aukið um 752 milljónir króna á nafnvirði í apríl, samkvæmt skjölum sem send voru til fyrirtækjaskráar. Arion banki tók einnig þátt í aukningunni og á í dag 16 prósent hlut í United Silicon. Það kom fram í svari bankans við fyrirspurn Kjarnans í gær. Arion banki er líka aðal lánardrottinn United Silicon. Arion rekur auk þess Frjálsa lífeyrissjóðinn og hann er til húsa í höfuðstöðvum bankans í Borgartúni.
Arion banki mun birta hálfsársuppgjör sitt í næstu viku og þar verður fjallað um stöðu United Silicon og áhrif hennar á bankann. Viðbúið er að Arion þurfi að færa varúðarniðurfærslu vegna vandræða fyrirtækisins. Kjarninn leitaði upplýsinga hjá United Silicon í gær um hvernig eigendahópurinn væri samansettur í dag, eftir áðurnefnda hlutafjáraukningu í byrjun apríl. Sá hópur mun óhjákvæmilega verða fyrir miklum áhrifum vegna stöðunnar sem er uppi. Fyrir liggur að reksturinn er að mestu í eigu félags sem er skráð í Hollandi en engar upplýsingar um hluthafaskrá er að finna í íslenskri fyrirtækjaskrá. Kristleifur Andrésson, talsmaður United Silicon, sagði að upplýsingar um eignarhaldið verði ekki gefnar upp að svo stöddu.
Starfandi í sjö mánuði
Greint var frá því í vikunni að félagið sem á verksmiðju United Silicon, einnig þekkt sem Sameinað Silicon, í Helguvík hafi fengið greiðslustöðvun og ætli í nauðasamningsgerð við stærstu kröfuhafa sína. Verksmiðjan hóf starfsemi í nóvember í fyrra og hefur því einungis verið starfandi í rúma sjö mánuði. Ljóst er að áhrif greiðslustöðvunarinnar hérlendis – og nauðasamninganna ef þeir nást – verða víðtæk.
