Sig­mundur Davíð Gunn­laugs­son, fyrr­ver­andi for­maður Fram­sókn­ar­flokks­ins og for­sæt­is­ráð­herra, segir að ef stjórn­mála­menn, emb­ætt­is­menn, fjöl­miðl­ar, fræði­menn og aðrir sem hafi það hlut­verk að ræða lausnir, horfa til fram­tíðar og móta stefnu þora ekki að ræða stærstu úrlausn­ar­efni sam­tím­ans, eins og aukin flótta­manna­straum, þá séu þeir að eft­ir­láta öfga­mönnum umræð­una og lausn­irnar á mál­inu. Þetta kemur fram í grein sem hann skrifar í Við­skipta­blaðið í dag þar sem hann kallar eftir umræðu um flótta­fólk.

Í henni segir Sig­mundur Dav­íð, sem nú er þing­maður Fram­sókn­ar­flokks­ins, að straumur flótta­manna og ann­ars föru­fólks til Evr­ópu sé far­inn að valda veru­legri tog­streitu inn­an, og á milli, Evr­ópu­landa og að þau átök séu að áger­ast. Flestir þeirra sem komi til dæmis yfir hafið frá Líbýu til Ítalíu séu ekki að flýja stríð, heldur að leita betri lífs­kjara. Að óbreyttu muni þeim sem leggi í slíka för fjölga jafnt og þétt sam­hliða því að hagur fátæk­ustu ríkja heims muni vænkast. Fólks­fjölgun muni verða gríð­ar­leg í þró­un­ar­lönd­unum á næstu ára­tugum og við lok yfir­stand­andi aldar muni 14 af 25 fjöl­menn­ustu ríkjum heims vera í Afr­íku, en ekk­ert í Evr­ópu.

Sigmundur Davíð segir að fram að þeim tíma þurfi að leysa ýmis mál. „Til að byrja með þarf stefnu. Ef stjórn­mála­menn, emb­ætt­is­menn, fjöl­miðl­ar, fræði­menn og aðrir sem hafa það hlut­verk að ræða lausnir, horfa til fram­tíðar og móta stefnu þora ekki að ræða stærstu úrlausn­ar­efni sam­tím­ans eru þeir að eft­ir­láta öfga­mönnum umræð­una og lausn­irn­ar. Ef það ger­ist er ólík­legt að heim­ur­inn haldi áfram að batna.“

Sagði Fram­sókn skorta sann­fær­ingu í mál­efnum hæl­is­leit­enda

Fyrr í dag til­kynnti Svein­björg Birna Svein­björns­dótt­ir, odd­viti Fram­sóknar og flug­vall­ar­vina, að hún hefði sagt sig úr Fram­sókn­ar­flokkn­um. Í stöðu­upp­færslu á Face­book sagði hún að að innan Fram­­sókn­­ar­­flokks­ins séu skiptar skoð­­anir um mál­efni hæl­­is­­leit­enda. „Flokks­­menn eru hins vegar ragir við að tjá skoð­­anir sínar opin­ber­­lega. Af ein­hverjum ástæðum eru Fram­­sókn­­ar­­menn sér­­stak­­lega við­­kvæmir þegar að þessu kem­­ur. Í huga margra þeirra jafn­­­gildir það því að ganga fyrir björg að láta í ljós raun­veru­­lega afstöðu sína í mál­efnum hæl­­is­­leit­enda. Þeir telja að þau séu svo „við­­kvæm“ að þeirra eigin sann­­fær­ing skipti ekki máli! Þeir velja því að end­­ur­óma skoð­­anir sem þeir telja lík­­­legar til að forða þeim frá frek­­ari spurn­ing­­um. Vandi þeirra er hins vegar sá að almenn­ingur heyrir ágæt­­lega. Almenn­ingur heyrir holan hljóm. Fram­­sókn­­ar­­menn skortir sann­­fær­ingu þegar þeir eru inntir eftir afstöðu sinni til mál­efna hæl­­is­­leit­enda.“