Gagnsæi, samtök gegn spillingu (www.gagnsaei.is), fordæmir ákvörðun Sýslumannsins á höfuðborgarsvæðinu um að setja lögbann á umfjöllun Stundarinnar og Reykjavik Media á málefni sem tengjast Glitni og forsætisráðherra, Bjarna Benediktssyni.
Þetta kemur fram í tilkynningu frá samtökunum.
Í henni segir meðal annars að frjáls fjölmiðlun sé hornsteinn í lýðræðissamféögum og í henni felist nauðsynleg vörn gegn spillingu. „Lögbann á umfjöllun Stundarinnar á bankaviðskipti forsætisráðherra fyrir hrun, að beiðni rekstraraðila gjaldþrota banka, er furðuleg: Glitnir HoldCo hefur engra sýnilegra viðskiptahagsmuna að gæta er varða viðskipti einstaklinga sem áttu sér stað í hinu gjaldþrota félagi fyrir 9 árum síðan. Til stendur að leysa Glitni HoldCo upp og afhenda kröfuhöfum eignir úr búi félagsins.Því á Glitnir HoldCo ekki hagsmuna að gæta er varðar viðskipti félagsins til framtíðar. Ekki kemur fram í tilkynningu frá Glitni Holdco hvaða hagsmuni þrotabúsins er verið að verja. Hagsmunir almennings eru hins vegar verulegir: Hann á rétt á upplýsingum um viðskiptahætti og viðskiptahagsmuni forsætisráðherra landsins, í tengslum við fall íslenska bankakerfisins árið 2008, á meðan hann sjálfur var fulltrúi almennings og bar því skylda til að gæta hagsmuna almennings,“ segir í tilkynningunni.
Í lögbannsbeiðninni, sem birt var á vef Kjarnans í gærkvöldi, segir að Glitnir Holdco telji það brot gegn þagnarskyldu að birta umfjallanir sem unnar eru upp úr gögnunum, og að hugsanlega sé Stundin með gögn um þúsundir viðskiptavina Glitnis.
Annar ritstjóra Stundarinnar, Jón Trausti Reynisson, segir að lögbannið sé forkastanlegt inngrip í lýðræðislega umræðu. Því hefur verið mótmælt kröftuglega, en réttaróvissu um lögmæti lögbannsins verður ekki eytt fyrr en eftir kosningar, 28. október.
„Það er ekki aðeins réttur almennings að upplýst sé um viðskiptahagsmuni stjórnmálamanna, það er einnig mikilvægt til að ná stöðugleika í íslensku samfélagi eftir erfið og róstusöm ár, að traust skapist gagnvart Alþingi og stjórnmálamönnum. Slíkt traust myndast ekki sé komið í veg fyrir að fjölmiðlar geti sinnt því hlutverki sínu að gæta hagsmuna almennings.
Almenningur, ekki dómstólar, þarf að meta hvenær stjórnmálamaður bregst trausti eða misnotar aðstöðu sína. Til kasta dómstóla kemur ef áhöld eru um að stjórnmálamaður hafi brotið lög. Í aðdraganda kosninga er einkar mikilvægt að almenningur geti kynnt sér gögn um viðskipti forsætisráðherrans, þáverandi alþingismanns, í tengslum við atburði er vörðuðu fjárhagslega jafnt sem félagslega stöðu næstum hvers einasta Íslendings. Yfirgnæfandi meirihluti Alþingis samþykkti að sérstök Rannsóknarnefnd þingsins, hefði aðgang og heimild til að birta upplýsingar úr sömu gögnum sem Guardian og Stundin hafa nú undir höndum. Ekkert bendir til að þessir fjölmiðlar hafi haft í hyggju að birta aðrar upplýsingar úr gögnunum en þær sem varða hagsmuni almennings,“ segir í tilkynningu Gagnsæis.
