Karl Steinar Ósk­ars­son, sem gengt hefur starfi fram­kvæmda­stjóra útgáfu­fé­lags­ins Birtíngs, hefur óskað eftir því að láta af störfum hjá félag­inu. Sig­ríður Dagný Sig­ur­björns­dóttir tekur við starf­inu af Karli Stein­ari.

Útgáfu­fé­lagið Birtíngur gefur út tíma­ritin Vik­una, Gest­gjafann, Hús og híbýli og frí­blaðið Mann­líf sem kom í út nýverið í fyrsta sinn. Mann­líf var unnið í sam­starfi við Kjarn­ann því rit­stjórn Kjarn­ans lagði til frétta­efni og umfjall­anir í blað­ið.

„Nú þegar end­ur­skipu­lagn­ingu á rekstri Birtíngs er að mestu lokið þá fannst mér kom­inn tími til þess að hverfa á önnur mið,“ er haft eftir Karli Stein­ari í frétta­til­kynn­ingu um breyt­ing­arn­ar. Hann hefur leitt vinnu við end­ur­skipu­lagn­ing­una á rekstri Birtíngs eftir að Dal­ur­inn ehf. keypti allt hlutfé útgáfu­fé­lags­ins í sum­ar.

Kjarn­inn greindi frá því í byrjun sum­ars að til stóð að Pressan ehf. myndi kaupa Birtíng en að frá því hafi að lokum verið fallið vegna fjár­hags­vand­ræða Pressunn­ar.

„Birtíngur er kom­inn á lygnan sjó og tími til komin að aðrir taki við. Ég hef verið þeirrar gæfu aðnjót­andi að starfa með afburða­fólki og kveð það með trega, en óska þeim alls hins besta í fram­tíð­inn­i,“ segir Karl Stein­ar.

Sig­ríður Dagný seg­ist hlakka til að taka við stöðu fram­kvæmda­stjóra: „Með nýjum áherslum og eig­endum Birtíngs opn­ast ýmis spenn­andi tæki­færi sem verður gaman að takast á við.“