Ey er nýtt tímarit sem gefið var út í fyrsta skiptið 11. nóvember síðastliðinn. Í svari við fyrirspurn Kjarnans um verkefnið segir að það sé á vegum Vestmannaeyjabæjar. „Undir það fellur veftímarit sem fjallar um skemmtilega hluti sem eru í gangi í bænum, sem og áhugaverða hluti sem Vestmannaeyingar eru að gera utan Eyja,“ segir í svarinu.
Þau stefni einnig á að halda viðburði tengda átakinu, t.d. matarmarkað í anda þess sem hefur sést í Reykjavík og víðar á liðnum árum. „Við erum opin fyrir hvers kyns umfjöllunarefni, svo lengi sem það tengist Vestmannaeyjum að einhverju leyti.“
Elliði Vignisson, bæjarstjóri Vestmannaeyjabæjar, byrjar á því að ávarpa Eyjamenn í leiðara tímaritsins. Hann segir það ekki einfalt að lýsa fyrir öðrum hvernig það sé að vera Vestmannaeyingur. Eiginlega alveg ómögulegt. Enda ekkert skrýtið, hvernig eigi sá sem er alinn upp annars staðar að geta sett sig í spor manneskju sem finnst fullkomlega eðlilegt að leggja allt til hliðar og einhenda sér í það að bjarga ófleygum lundapysjum dag eftir dag? „Hvernig á maður líka að geta lýst í orðum þessari næstum áþreifanlegu, stígandi eftirvæntingu sem fylgir Þjóðhátíð? Gleðinni sem fylgir Þrettándanum?“ spyr hann.
„Hvernig það er að búa á virku eldfjalli og finnast Heimaklettur vera hluti af fjölskyldunni? Ólýsanlegt.
Það er þetta og svo ótalmargt annað sem sameinar okkur og gerir okkur að Vestmannaeyingum. Þú veist hvað ég meina,“ segir hann.
Elliði bætir því við að svo sé líka bara svo gott að búa í Eyjum og það sé mikil uppbygging í bænum. Íbúðir rísi, fyrirtæki styrkist, von sé á nýjum Herjólfi, verið sé að byggja húsnæði fyrir fatlaða og aldraða og leikskólar stækka. Eins og sjáist á öflugu starfi leikfélags, kóra, lúðrasveitar, myndlistarmanna og annarra, þá sé menningin einnig sterk. Bíóið sé þar frábær viðbót, gróska í veitingarekstri sé með ólíkindum og söfnin þeirra hafi vakið eftirtekt víða um heim. Hann segir að nýtt sædýrasafn, með hvali sem aðalaðdráttarafl, komi til með að auka hróður safnanna enn frekar, enda afar metnaðarfullt verkefni þar á ferð. Svo sé það ÍBV. Frábært starf hjá yngri flokkum og bikarmeistarar karla og kvenna 2017. Þvílíkt ár, þvílíkt félag, segir hann.
„Þessi árangur er engin tilviljun og er vitnisburður um styrk Eyjamanna. Eljusemi, dugnaður og ósérhlífni hefur skilað okkur þangað sem við erum. Heimir okkar Hallgrímsson getur sagt okkur allt um það. Við erum alltaf til í að gera þetta „extra“ sem þarf,“ segir hann.
Af þessum ástæðum ræðst bærinn í átakið Ey, að sögn Elliða. Það sé hluti af þeirra „extra“. „Með því viljum við horfa aðeins inn á við, hlúa vel að bænum okkar og fólkinu sem í honum býr. Með átakinu ætlum við að brydda upp á alls kyns nýjungum, standa fyrir skemmtilegum uppákomum og minna okkur á að það er ástæða fyrir því að við veljum að búa í Vestmannaeyjum. Minna okkur á að við getum alltaf gert betur,“ bætir hann við.
Þau vilji gera íbúa jafnvel enn stoltari af því að búa í Eyjum. Þannig búi þau ekki bara til betra samfélag, heldur geri Vestmannaeyjar að enn ákjósanlegri áfangastað gesta. Reynslan hafi nefnilega sýnt að lífsgleði þeirra Eyjamanna sé smitandi og hrífi þá sem þangað koma.
„Við viljum auka á jákvæðni meðal Vestmannaeyinga og virkja bæði bæjarbúa og fyrirtæki í bænum til góðra verka. Við skulum standa saman um að deila gleðinni því þannig hlúum við best að því sem okkur er kærast,“ segir hann að lokum.
