Stjórn VR skorar á almenning og fyrirtæki á Íslandi að hugsa sig um áður en þau beina viðskiptum sínum til fyrirtækja sem greiða út ofurbónusa til æðstu stjórnenda og hvetur fólk til að taka afstöðu gegn þessum bónusum. Þetta kemur fram í fréttatilkynningu frá VR.
Greint var frá því í gær að stjórnendur og stjórnarmenn Klakka, sem áður hét Exista, og heldur utan um 100 prósenta hlut í eignaleigufyrirtækinu Lykli, áður Lýsing, geta fengið samanlagt um 550 milljónir króna í bónus í tengslum við væntanlega sölu á Lykli og vegna annarra eigna félagsins sem hafa verið seldar á síðustu árum.
Stærsti eigandi Klakka er bandaríski vogunarsjóðurinn Davidson Kempner en íslenskir lífeyrissjóðir, einkum LSR, Gildi, Lífeyrissjóður verslunarmanna og Birta, eiga einnig samtals um sex prósenta hlut í Klakka.
Kjarninn fjallaði um málið í gær en í tilkynningu frá Klakka kemur fram að frumkvæðið að kaupaukagreiðslum til lykilstarfsmanna og stjórnar Klakka, sem geta numið allt að 550 milljónum króna, komi frá erlendum eigendum félagsins.
Þar segir að það sé skiljanlegt að svo stórar upphæðir eins og þarna sé um að tefla veki athygli og að spurt sé hver taki ákvörðun um þær. „Svarið við því er eigendur félagsins. Ríflega 80% hlutafjár Klakka er, beint og óbeint, í eigu erlendra aðila og er frumkvæðið að kaupaukagreiðslunum alfarið þeirra þó að stjórn hafi fjallað um útfærsluna og að beiðni þeirra lagt hana fyrir hluthafafund til samþykktar.
Þá skal minnt á að þær upphæðir sem fram hafa komið í fjölmiðlum eru ekki endanlegar heldur eru það hámarksgreiðslur vegna heildareigna Klakka sem koma aðeins til ef mjög hátt verð fæst fyrir Lykil. Greiðslurnar geta orðið mun lægri eða jafnvel engar. Sérstök áhersla er á að kynna söluferli Lykils fyrir erlendum kaupendum og eigendur Klakka telja mikilvægt að allir sem að sölunni komi hafi beina fjárhagslega hagsmuni af því að sem allra hæst verð fáist fyrir félagið, eigendum þess til hagsbóta.“
Fulltrúi lífeyrisjóða ekki viðstaddur
Í Markaðnum, fylgiriti Fréttablaðsins um efnahagsmál og viðskipti, segir að hluthafafundur Klakka hafi samþykkt, síðastliðinn mánudag, tillögu að kaupaukakerfi sem lögð var fram af stjórn félagsins, sem nær til þriggja starfsmanna Klakka og sex manna stjórnar félagsins. Fulltrúi lífeyrissjóðanna var ekki viðstaddur á fundinum, en Kristján B. Thorlacius, hæstaréttarlögmaður og einn stjórnarmanna Klakka, hefur verið studdur af sjóðunum í stjórn félagsins en hann er á meðal þeirra sem bónuskerfið nær til.
Auk Magnúsar Scheving Thorsteinssonar forstjóra eru starfsmenn Klakka þau Jón Örn Guðmundsson fjármálastjóri og Brynja Dögg Steinsen rekstrarstjóri.
Stjórnarformaður Klakka til margra ára er Pétur J. Eiríksson en aðrir Íslendingar, fyrir utan Kristján, sem sitja í stjórninni eru Steinn Logi Björnsson, fyrrverandi forstjóri Skipta og Húsasmiðjunnar, og Gunnar Þór Þórarinsson, lögmaður hjá Logos.
„Gangi tilteknar forsendur eftir sem kaupaukakerfið grundvallast á, en upphafsdagur þess miðast við 17. mars 2016, gætu heildarbónusgreiðslur til þessara níu stjórnenda félagsins numið allt að 4,42 milljónum evra, jafnvirði tæplega 550 milljóna íslenskra króna. Stjórnendur Klakka gætu því fengið að meðaltali yfir 60 milljónir króna á mann í sinn hlut í bónus,“ segir í umfjöllun Markaðarins.
Tilkynning VR:
„Tökum afstöðu gegn ofurbónusum!
Í ljósi frétta af fyrirhuguðum ofurbónusgreiðslum til æðstu stjórnenda hjá fjármálafyrirtækinu Lykill, áður Lýsing, skorar stjórn VR á almenning og fyrirtæki á Íslandi að hugsa sig um áður en þau beina viðskiptum sínum til fyrirtækja sem haga sér með þessum hætti.“
