„Ljóst er af afskiptum samkeppnisyfirvalda af málefnum mjólkuriðnaðarins, að Samkeppniseftirlitið fjallar ekki um málefni MS og mjólkuriðnaðarins af þeirri hlutlægni, sem gera verður kröfu um til stofnunar á vegum ríkisins,“ segir í fréttatilkynningu frá Mjólkursamsölunni.
Í tilkynningunni sem ber titilinn „Málarekstur sem fær ekki staðist“ fjallar Mjólkursamsalan um málarekstur Samkeppniseftirlitsins gegn MS en eftirlitið hefur höfðað dómsmál gegn MS til ógildingar á úrskurði áfrýjunarnefndar samkeppnismála.
MS segir að enda þótt mjólkuriðnaðurinn hafi heimild til samstarfs á grundvelli búvörulaga sé hann ekki undanþeginn banni samkeppnislaga við misnotkun á markaðsráðandi stöðu. „Samkeppniseftirlitið heldur því fram í málshöfðun sinni að MS hafi brotið gegn banninu en áfrýjunarnefndin talið að ákvæði búvörulaga veittu undanþágu frá bannreglunni. Enginn fótur er fyrir þessari túlkun því niðurstaðan byggðist á að engin misnotkun hefði átt sér stað. Áfrýjunarnefndin úrskurðaði að framkvæmd samstarfsins hefði verið málefnaleg og forsvaranleg,“ segir í tilkynningunni.
MS heldur því fram að framganga fyrirtækisins á markaði hafi verið í samræmi við efnisreglur samkeppnislaga og annarra laga. Síendurteknar fullyrðingar stjórnendar Samkeppniseftirlitsins um annað hafi ekki staðist. Augljóst sé að stjórnendur þess séu ósáttir við það fyrirkomulag sem löggjafinn hafi ákveðið að hafa á mjólkurmarkaði en þeim beri eins og öðrum í samfélaginu að virða gildandi lög.
Klofin áfrýjunarnefnd felldi megnið af sektinni úr gildi
Samkeppniseftirlitið lagði 440 milljóna króna sekt á MS vegna málsins í júlí árið 2016, vegna þess að fyrirtækið hefði misnotað markaðsráðandi stöðu sína með því að selja keppinautum sínum hrámjólk á óeðlilega háu verði á sama tíma og fyrirtækið sjálft og tengdir aðilar fengu sama hráefni undir kostnaðarverði. Niðurstaða Samkeppniseftirlitsins var að þetta hefði veitt MS og tengdum aðilum verulegt samkeppnisforskot og geta keppinauta hafi verið skert með alvarlegum hætti. Það væri á endanum fallið til þess að skaða hagsmuni neytenda og bænda.
MS skaut málinu til áfrýjunarnefndar samkeppnismála, sem komst að þeirri niðurstöðu að undanþáguákvæði í búvörulögum hefðu vikið banni samkeppnislaga við misnotkun á markaðsráðandi stöðu til hliðar. Sektin var felld úr gildi, en nefndin staðfesti að MS hefði framið alvarlegt brot með því að halda upplýsingum frá yfirvöldum, og fyrirtækið ætti að greiða 40 milljóna sekt vegna þess. Áfrýjunarnefndin klofnaði í afstöðu sinni til málsins.
Nauðsynlegt að fá niðurstöðu um samspil búvöru- og samkeppnislaga
Í fréttatilkynningu frá Samkeppniseftirlitinu sem fylgdi í kjölfar þeirri frá MS kemur frma að Héraðsdómur Reykjavíkur hafi í dag hafnað kröfu MS um að málinu yrði vísað frá dómi.
„Hefur Samkeppniseftirlitið talið að mikilvægt væri fyrir hagsmuni smærri framleiðenda, bænda og neytenda að fá úr þessu skorið. Úrskurðurinn felur í sér að málið fær nú efnismeðferð fyrir héraðsdómi.“
Eftirlitið segir að eftir skoðun á forsendum úrskurðar meirihluta áfrýjunarnefndar hafi það talið nauðsynlegt að stefna MS til þess að fá niðurstöðunni hnekkt um samspil búvörulaga og samkeppnislaga. „Miðar sú málshöfðun að því að fá úr því skorið hvort bann samkeppnislaga við misnotkun á markaðsráðandi stöðu taki að fullu til MS. Jafnframt verði fengin fullnaðarúrlausn um hvort fyrirtækið skuli sæta fullri ábyrgð vegna þeirrar háttsemi sem fjallað er um í málinu og Samkeppniseftirlitið hefur metið sem alvarleg brot gegn minni keppinautum. Mun Samkeppniseftirlitið krefjast þess að MS greiði þá stjórnvaldssekt sem eftirlitið taldi hæfilega í ákvörðun sinni frá júlí 2016,“ segir í tilkynningu Samkeppniseftirlitsins.
