Jarðskjálftahrinur hafa verið mjög tíðar í nágrenni Grímseyjar undanfarin misseri. Jarðskjálftahrina um 10-12 km norðaustan við Grímsey hefur staðið nær óslitið frá 14. febrúar og um hádegi þann 16. febrúar höfðu hátt á annað þúsund skjálftar mælst á svæðinu.
Á vef Veðurstofu Íslands kemur fram að sumir skjálftana hafi fundist vel í Grímsey, og í gær fundu íbúar á Akureyri einnig fyrir skjálfa. „Rúmlega 10 skjálftar yfir þrír að stærð hafa mælst og þann 15. febrúar kl. 19:37 mældist skjálfti af stærð 4.1. Sumir þessara skjálfta hafa fundist í Grímsey. Þetta er mesta skjálftahrina á þessu svæði síðan í apríl 2013 þegar kröftug hrina varð í kjölfar skjálfta af stærðinni 5.5 á svipuðum slóðum,“ segir á vef Veðurstofunnar.
Tekið er fram að minni orkuútlausn sé í þessari hrinu, heldur en á árum áður, en hún hafi þó verið nær óslitin. „Mun minni orkuútlausn mælist í þessari hrinu en hún hefur verið óslitnari en þó hviðukennd. Samfelldar GPS mælingar í Grímsey sýna enga mælanlega aflögun tengda þessari hrinu sem bendir til að skjálftavirknin sé frekar tengd flekaskilunum og jarðhitavirkninni á þessum slóðum. Benda verður á að á þessu svæði og raunar öllu Tjörnesbrotabeltinu geta orðið mun stærri skjálftar og því verður alltaf að hafa í huga að í kjölfarið á hrinum sem þessum geta orðið talsvert stærri skjálftar. Upplýsingar um varnir og viðbúnað við stærri jarðskjálftum má finna á síðu Almannavarna. Örlítið hefur dregið úr hrinunni enn þó getur hún tekið sig upp aftur og ómögulegt er að segja fyrir um hvenær henni lýkur,“ segir á vef Veðurstofunnar.
Í viðtali við Morgunblaðið í dag, segir Ármann Höskuldsson, jarfræðingur, að þetta sé óvenjuleg hrina, og greinilegt sé að töluverð spennulosun sé á svæðinu. Hann hvetur Húsvíkinga og fólk á áhrifasvæði jarðskjálftana til að taka brothætta hluti niður úr hillum og búast við jarðhræringum.
